«Үлэ кыбаартала» Уһук Илиҥҥэ бастыҥ архитектурнай бырайыак буолла — НВК Саха

«Үлэ кыбаартала» креативнай кластер «Лучший архитектурный проект по Дальнему Востоку» анал аат кыайыылааҕа буолла.

Россия үтүөлээх архитектора Александр Ческидов аатынан «ДВ Зодчество-2023» Уһук Илиҥҥи архитектурнай бэстибээлгэ саха архитектордара «Создание Креативного кластера в Якутске» бырайыактарынан үрдүк наҕарааданы ыллылар.

Саха сирин Ил Дархана «Россиятааҕы креативнай нэдиэлэҕэ» өрөспүүбүлүкэ креативнай кыаҕын билиһиннэрэригэр ааспыт сыл сэтинньитигэр Уһук Илиҥҥэ бастакы креативнай кластер арыллыытын сүдү суолталаах ситиһии буоларын бэлиэтээтэ.

«Үлэ кыбаарталын биһиги саҥалыы туппатахпыт, эт комбинаатын эргэ тутуутугар аныгы креативнай эйгэни оҥордубут. Мин санаабар бу дойдуга биир бастыҥ буолар. Кластер иһигэр бастатан туран, киинэ, анимация, постпродакшн, музыка, муода, креативнай экономикаҕа үөрэх өҥөлөрө бааллар. Бу бырайыак креативнай экономикаҕа биһиги Уһук Илиҥҥэ, дойдуга инники күөҥҥэ сылдьарбытыгар төһүү күүс буолуоҕа», – диэн Айсен Николаев эттэ.

Кластерга билигин 70 резидент үлэлиир. Инникитин резидент ахсаана 150 буолуоҕа. Креативнай кластер баар буолуоҕуттан эбии 1200 үлэ миэстэтэ баар буолуоҕа.

«Биһиги Уһук Илиҥҥи архитектурнай бэстибээлгэ кыайыахпыт дии санаабатахпыт. Бу олус сэдэх бириэмийэ, түөртэ эрэ туттарылла сылдьыбыт. Биһиги бэһис бириэмийэни ыллыбыт. Икки анал аакка сайаапка биэрдибит: „Реставрация и реконструкция зданий, сооружений и комплексов“ уонна „Дизайн интерьеров“», – диэн салайааччыта Мария Скрябина эттэ.