Бэҕэһээ, ыам ыйын 25 күнүгэр, Хаҥалас улууһун Хачыкаат нэһилиэгэр «Алексей Кулаковскай – Саха сирин духуобунай лиидэрэ» диэн научнай-практическай симпозиум бастакы күнэ түмүктэннэ.
Дьокуускайтан уонна араас оройуоннартан бочуоттаах ыалдьыттары бэлиэ тэрээһиҥҥэ алгыһынан көрүстүлэр. Симпозиум кыттыылаахтара Өскөкүлээх Өлөксөй «Саха интеллегенциятыгар» суругун ырыттылар.
Норуоднай депутат Елена Голомарева бэлиэтээбитинэн, бу тэрээһин аныгы кэмҥэ Өксөкүлээх Өлөксөй айымньыларын, үлэлэрин саҥа таһымҥа таһаарар сыаллаах-соруктаах ыытыллар.
«Олус интэриэһинэй кэпсэтии ааста. Бу тэрээһин сыалынан Алексей Елисеевич Кулаковскай олоҕун-дьаһаҕын, айар үлэтин, айымньыларын аныгы үйэ хараҕынан көрүү, кини үлэлэрин үйэтитии буолар. Оройуоннарга, нэһилиэктэргэ улуу диэйэтэл аатын үйэтитэргэ улахан үлэлэр ыытыллыахтара диэн эрэнэбин», — бэлиэтээтэ кини.
Симпозиум бастакы күнэ түмүктэниитигэр Олохҥо тыйаатырыгар «Ойуун түүлэ» испиктээкили көрдөрдүлэр.
Бу тэрээһин Өксөкүлээх Өлөксөй төрөөбүтэ 145 уонна «Саха интеллегенциятыгар» сурук 110 сыллаах үбүлүөйдэригэр ананар.
Симпозиум Саха сирин Бастакы бэрэсидьиэнэ, судаарыстыбаннай сүбэһит Михаил Николаев уонна Саха сирин Ил Дархана Айсен Николаев көҕүлээһиннэринэн ыытыллар.