Быйыл 2021 сылга Өлүөхүмэҕэ ыытыллар Олоҥхо Ыһыаҕын болдьоҕо нэһилиэнньэ быһыыны ылыытын таһыма намыһаҕынан сибээстээн көһөрдүлэр. Бу туһунан Саха сирин баһылыгын уонна бырабыыталыстыбатын дьаһалтатын пресс-сулууспата иһитиннэрэр.
Маннык быһаарыы, бэс ыйын 10 күнүгэр, СӨ бырабыыталыстыбатын бэрэссэдээтэлин солбуйааччыта Сергей Местников салалтатынан ыытыллыбыт сүбэ мунньах түмүгүнэн ылылынна.
Өлүөхүмэ улууһун баһылыга Николай Харбин иһитиннэрбитинэн, билигин COVID-19 утары бастакы быһыыны ылбыт олохтоох дьон ахсаана — 32%-ҥа тэҥнэһэр, оттон иккис быһыыны ылбыттар ахсааннара баара-суоҕа — 18%-н.
«Өрөспүүбүлүкэтээҕи олоҥхо ыһыаҕын ыытар улууска бу олус намыһах көрдөрүү буолар. Хаалбыт күннэргэ быһыыны ылбыт дьон ахсаанын 70 %-ҥа диэри элбэтэргэ, тэрээһини бэс ыйын 20-21 күнүттэн бэс ыйын 26-27 күннэригэр көһөрөр туһунан быһаарыы ылылынна», — диэн иһитиннэриигэ этиллэр.
Тэрийээччилэргэ уонна кыттааччыларга түһүлгэни, дьиэни дезинфекциялааһыҥҥа, мааскалаах сылдьыы уонна социальнай дистанцияны тутуһууга, кыттааччылар уонна көрөөччүлэр икки ардыларыгар алтыһыыны аҕыйатар туһунан инструктаж ыыттылар.
Уустук эпидемиологическай быһыы-майгы олохтонон, култуурунай бырагыраамаҕа киллэриллибит оҕолор ортолоругар куонкурустары тохтотуохтара.
Сергей Местников Ыһыаҕы санитарнай-эпидемиологическай ирдэбиллэри тутуһан ыытар наадатын бэлиэтээтэ. 2021 сылга улуустааҕы уонна нэһилиэктээҕи бырааһынньыктар үксүлэрэ бобуллан эрэллэрин учуоттаан, өрөспүүбүлүкэтээҕи Олоҥхо ыһыаҕа соҕотох улахан национальнай тэрээһин буоларын тоһоҕолоото.