Өлүөнэ өрүс мууһа Өлүөхүмэҕэ кэлэн иҥиннэ, уу таһыма үрдээн нэһилиэнньэлээх пууннары ылла. Онон Өлүөхүмэҕэ ыксаллаах быһыы-майгы эрэсиимэ олохтонно.
Намыһах сирдэринэн уу киирэн Кыыллаах, 1-кы Нөөрүктээйи уонна Хоро нэһилиэкэригэр сорох сиринэн дьиэлэр ууга бардылар. Бу сарсыарда СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников салайыытынан суһал мунньах ыытылынна. Халаан содулун хайдах намтатар, харыы тахсыбыт сирдэринэн мууһу тоҕу тэптэрэр туһунан быһаарыныылар ылынылыннылар.
Кыыллаах сэлиэнньэтигэр уу кыратык түстэ, 134 киһи олорор 62 ыал тиэргэнэ ууга барда. Быстах кэмҥэ олорор пууҥҥа 47 киһи киирдэ, атыттар аймахтарынан тарҕатылыннылар.
1-кы Нөөрүктээйигэ эмиэ уу таһыма кыралаан түһэн эрэр. 59 киһи олорор 18 ыал дьиэтэ ууга барда. Быстах кэмҥэ олорор пууҥҥа 9 киһи киирдэ.
Хороҕо уу таһыма үрдээн баран түспэккэ турар. 38 ыал дьиэтин уу ылла. 100 киһи эвакуацияланна, олортон 22 киһи быстах кэмҥэ олорор пууҥҥа киирдэ.
Улууска дьону таһыыга уонна мууһу дэлби тэптэрэр үлэҕэ «Полярные авиалинии» хампаанньа икки бөртөлүөтэ үлэлиир. Өссө биир ЫБММ бөртөлүөтэ 2 туонна дэлби тэптэрэр веществоны илдьиэҕэ диэн Дмитрий Садовников иһитиннэрэр.
Оттон СӨ Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйар министиэристибэ иһитиннэрбитинэн, Өлүөхүмэ улууһугар генерал-майор Павел Гарин салайааччылаах «Лена» бастакы суһал бөлөх үлэлии сылдьар.
«Өлүөхүмэ улууһугар тыҥааһыннаах балаһыанньа үөскээтэ, ону кэтии-маныы олоробут. Сабаҕалааһын быһыытынан уонна балаһыанньаттан көрөн быһаарыы ылыллан, үлэ барар. Суһал бөлөх түүннэри-күнүстэри үлэлиир кыахтаах уонна салгын суудуната көтөргө бэлэм», — диэтэ СӨ Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйар миниистир Дмитрий Лепчиков.
Бу сарсыарда «Полярные авиалинии» хампаанньа МИ-8 бөртөлүөтэ быыһааччылары уонна дэлби тэптэрээччилэри илдьэ Өлүөхүмэ улууһугар тиийэн үлэтин саҕалаата.