Өлүөхүмэ улууһугар XIV өрөспүүбүлүкэтээҕи Олоҥхо ыһыаҕын эмблематын бигэргэттилэр. Бу туһунан Өлүөхүмэ улууһун дьаһалтатын пресс-сулууспата иһитиннэрэр.
«Олоҥхо ыһыаҕын эмблематын сүрүн матыыбынан — Күн, Аал-Луук Мас уонна Аан Алахчын хотун кыыһа буолла. Эмблема орототугар Аан Алахчын Хотун кыыһа уонна Аал-Луук мас көстүүтэ ойууламмыт. Композиция төрдүнэн оһуор быһыылаах өрүс буолбут. Өрүс Өлүөхүмэ улууһугар историческэй фрагмен быһыытынан биллэр», — диэн иһитиннэриигэ этиллибит.
Олоҥхо ыһыаҕын бэлиэтэ араҕас, халлаан — күөх уонна от — күөх улуус гербэтин өҥнөрүнэн толоруллубут. Эмблеманы Дьокуускайтан төрүттээх Валерий Петров оҥорбут.