«Евровидение» национальнай куонкурус 2022 сылга, Италия хоту өттүгэр баар Турин куоракка буолуоҕа. Бу туһунан ТАСС иһитиннэрэр.
ANSA ааҕыныстыбатын дааннайынан, Италия RAI судаарыстыбаннай көрдөрөр-иһитиннэрэр корпорациятын салалтата сотору кэминэн бу быһаарыы туһунан иһитиннэриэҕэ, ол эрэн Турин куоракка ыытыллара эрдэ бигэргэммит.
Пьемонт уобалаһын хотугу киинин таһынан куонкуруһу ыытыыга хандьыдааттарынан Милан, Болонья, Римини уонна Пезаро этилэр.
Maneskin бөлөх «Евровидениеҕа» кыайыытын түмүгэр, аныгыс куонкуруһу Италия тэрийэр бырааптаммыта. Италия бу кыайыыта «Евровидение» историятыгар үһүс уонна 1990 сылтан бастакы буолбута.
«Евровидение» — Европа сырдатар биэриитин ситимин дойдуларын иһинэн ыытыллар эстрада ырыатын куонкуруһа. Бэстибээл быһа эпииринэн көстөр. Кыайыылаахтары көрөөччүлэр уонна дьүүллүүр сүбэ куоластааһынынан быһаараллар, манна түмүктүүр түһүмэххэ уонна полуфиналга тахсыбыт дойдулар бары кытталлар. Куонкурус сыллата ыытыллар, 1956 сылтан саҕалаан аан дойдуга биир саамай биллэр тэрээһин буолар, 600 мөлүйүөҥҥэ тиийэ көрөөччүлээх.
2021 сылга куонкурус Роттердам куоракка буолбута, Россияны аатыттан ырыаһыт Manizha кыттыбыта, бэк-ырыаһыт — Июлина. Хамаанда Russian Woman ырыатынан тохсус миэстэҕэ тиксибитэ.