Саха АССР 100 сылынан «Саха» НКИХ ханаал төрөөбүт тылынан оҕо контенын олоххо киллэриэҕэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Быйыл саха тылынан 20 мультипликационнай киинэ оҥоһуллуо уонна биллэр Россия мультфильмнарын тылбаастыахтара.
⠀
Ол курдук, 2022 сылга «Фиксики» уонна «Смешарики» мультипликационнай киинэ 417 сиэрийэтэ тылбаастанара былааннанар.
⠀
«Ютуб ханаалга уонна эпииргэ таһаарарга ааптардартан көҥүл ыллыбыт. «Фиксики» бастакы сүүс сиэрийэтэ 2022 сыл бэс ыйын 1 күнүгэр ютуб ханаалга, итиэннэ «Мамонт» ханаалга тахсыа. Уоннааҕы сиэрийэлэрин сыл устата көрдөрүөхтэрэ», — диэн иһитиннэриигэ этиллэр.
Бу күннэргэ «Саха» НКИХ ханаала оҕо мультипликационнай киинэтин бастыҥ сценарийыгар уонна анимацияҕа аһаҕас куонкурус биллэрдэ. Мультфильмы оҥорооччулар икки бөлөхтөрүн кытары кэпсэтиини ыыттылар.
⠀
Итиэннэ, «Саха» НКИХ «Чохоон» ютуб-ханаала оонньуунан үөрэтэр контены тэрийиэҕэ. Ханаал сүрүн сыала — бэйэ норуотун историятын үөрэтии, оҕоҕо төрөөбүт тылын уонна төрүт култуураны иҥэрии, ону тэҥэ төрөөбүт тыл эйгэтигэр угуйуу, кэпсэтинньэҥ, аһаҕас буолуу үөрүйэҕин иҥэрии, толкуйдуур дьоҕурдаах уонна актыыбынай буолууну сайыннарыы.
Билигин ханаал уопсайа 430-тан тахса видеолаах, 14 тыһыынчаттан тахса суруттарааччылаах уонна 546 тыһыынча көрүүлээх (просмотр). Ханаалга «Сахалыы алпаабыт» үөрэтэр мульфильм 50 тыһыынчаттан тахса көрөөччүлээх, оттон «Смартпуонаптар түбэлтэлэрэ» мультипликационнай сериалы 20 тыһыынчата көрбүттэр.
⠀