2023 сыл Туймаада ыһыаҕа «Дьокуускай — килбиэннээх үлэ куората» девизтээх ыытыллыаҕа

«Туймаада ыһыаҕа-2023» төрүт бырааһынньыкка бэлэмнэнии Дьокуускай куоркка саҕаланна. Бу сылга «Дьокуускай — килбиэннээх үлэ куората» диэн девизтээх буолуоҕа.

Ону тэҥэ, тэрээһин дойдуга Педагог уонна настаабынньык сылыгар, региоҥҥа Үлэ сылыгар уонна саха халандаарынан «Дьөһөгөй айыы» сылыгар ананыаҕа. Бырагыраама чэрчитинэн Саха сирин улуустарын икки ардыгар түһүлгэ уонна айар түмсүүлэр кэнсиэрдиир балаһааккаларыгар күрэс ыытарга этии киллэрдилэр.

«Туймаада ыһыаҕын» сүрүннүүр режиссера, РФ култуура үтүөлээх үлэһитэ, СӨ үтүөлээх артыыһа Афанасий Федоров «Үс хатыҥ» архитектурнай-этнографическай комплексын сиэр-туом ыытыллар тутууларын өрөмүөннүүргэ ордук болҕомтону ууралларыгар сүбэлээтэ.

Ыһыах спортивнай бырагырааматын физическэй култуура уонна спорт управлениета бэлэмниир. «Дыгын оонньуулара» күрэх бастакы сүүмэрдиир түһүмэҕэ муус устар 4-5 күннэригэр «Триумф» спорт уораҕайыгар буолуоҕа, иккис түһүмэҕэ муус устар 25-26 күннэригэр. Управление салайааччыта Эдуард Ефимов эппитинэн, бастакы сүүмэрдиир түһүмэххэ 30 спортсмен кыттыаҕа.

Ыһыахтыыр сири ыраастааһыны, баһаартан куттал суох буолуутун, суол өрөмүөнүн куораттааҕы хомунаалынай сулууспалар хааччыйаллар. Бу сылга 60 бөх дьааһыгыттан 100-кэ диэри элбэтиэхтэрэ, уонна туалет ахсаана элбиэҕэ.

Тырааныспар уонна суол хаһаайыстыбатын салалтатын начаалынньыга Василий Амбросов иһитиннэрбитинэн, быраабы кэһиини кэтээн көрөр анал видеокамералар элбиэхтэрэ.

Суол быраабылатын кэһии түгэнигэр тырааныспар ыстарааптанар миэстэҕэ туруоҕа, итиэннэ уон эвакуатор үлэлиэҕэ. «Үс хатыҥҥа» диэри 155 уонна 156 нүөмэрдээх автобустар сылдьыахтара, билиҥҥи туругунан, төлөбүр сыанатын быһаараллар.

Үгэс быһыытынан, төрүт бырааһынньык бэс ыйын бүтэһик өрөбүллэригэр буолуоҕа.