Аан дойдуга эпидемиологическай балаһыанньанан «Виртуоз-хомусчут» үһүс норуоттар икки ардыларынааҕы куонкуруһу 2022 сыл сайыныгар көһөрдүлэр. Бу туһунан хомус түмэлин пресс-сулууспата иһитиннэрэр.
«Алтынньы 25 күнүнээҕи СӨ бырабыыталыстыбатын бэрэссэдээтэлин солбуйааччыта Сергей Местников салайыытынан тэрийэр кэмитиэт мунньаҕар норуоттар икки ардыларынааҕы варган уопсастыбатын этиитин болҕомтоҕо ылан, ону тэҥэ COVID-19 ыарыы аан дойдуга тарҕаныытын таһыма үрдээбитинэн куонкуруһу 2022 сыл сайыныгар көһөрөр туһунан быһаарыы ыллылар», — диэн иһитиннэриигэ этиллэр.
Куонкурус бэс ыйыгар ыытыллара былааннанар.
Тэрээһин сэтинньи 27-28 күннэригэр Дьокуускайга очно уонна кэтэхтэн буолуохтааҕа, гала-кэнсиэр Гагарин аатынан култуура дьиэтигэр 50% көрөөччүлээх ыытыллара былааннаммыта. Саха сириттэн региональнай куонкуруһу кыайбыт тоҕус хомусчут кыттыахтааҕа: Эркин Алексеев, Артур Семенов, Варвара Степанова, Айсен Деллохов, Айаал Дмитриев, Туяра Жиркова, Арыйаана Михайлова, Нарияна Ренанто-Бочкарева уонна Георгий Слепцов.