«Айта» киин прокатыгар саамай элбэх үбү киллэрбит — НВК Саха

Степан Бурнашев «Айта» киинэтэ дойду прокатыгар саамай кассовай саха киинэтэ буолбут.

«Степан Бурнашев «Айта» киинэтэ 11 күн иһигэр 18,1 мөл.солк. хомуйан саха киинэлэриттэн саамай хаассабай киинэ аатын ылла», — диэн этиллэр.

Бурнашев лиэнтэтэ киинэ тыйаатырдарыгар кулун тутар 30 күнүттэн тахсыбыта. «Айта» киинэ хомуйбут үбүнэн Алексей Амбросьев «Агент Мамбо» (прокат устата 16,6 мөл.солк. хомуйбут) уонна Роман Дорофеев «Зина & Леха «Операция хвост и вымя» (14,7 мөл.солк. хомуйбут), ону тэҥэ Дмитрий Давыдов «Пугало» (11,6 мөл.солк.хомуйбут) киинэлэри куоһарбыт.

«Бастакы өрөбүллэргэ киирбит үп көрдөрүүтүнэн, аналитиктар биһиги киинэбит Саха сиригэр рекорду олохтуох тустааҕын сабаҕалаабыттара, ол эрээри, маннык түргэнник куоһарыахпыт диэн кэтэспэтэхпит. Көрөөччүлэр комедияны эрэ буолбакка, атын жанрдары сэҥээрэллэр, өйүүллэр эбит диэн өйдөөтүбүт», — диэн Степан Бурнашев пресс-сулууспатын бэрэстэбиитэлэ эттэ.

Киинэ дьиҥнээх олохтон быһа тардыллан оҥоһуллубут. Ис хоһоонугар Айта диэн кыыс кылааһынньыктарын кытта көрсөн баран өлөр, онно Афоня диэн ааты суруйан хаалларбыт буолар. Сурах түргэнник тарҕанар, итиэннэ, Айтаны ол киэһэ дьиэтигэр илдьэн биэрбит Афанасий диэн полиция үлэһитин уорбалыыллар. Афанасий дьон иннигэр буруйданыан иннинэ, дьиҥ чахчыны билэргэ дьулуһар.

.