26 нүөмэрдээх Лебедев уулуссаҕа уопсайа 150,59 кв.м иэннээх, толору хааччыллыылаах саҥа таас дьиэни Михаил Гуляев генеральнай директордаах «ГМ Групп» ХЭТ тутан үлэҕэ киллэрдэ. Санатан этэр буоллахха, Михаил Гуляев бу иннинэ Хатырыкка «Республика скверин» уонна аҕыйах ахсааннаах баһаарынай чаас дьиэтин, Хатырык уонна Хамаҕатта киирии аартыктарын, кэккэ нэһилиэктэргэ дьон сынньанар сирдэрин туппута.
Сахалыы сиэринэн алгысчыт Владимир Сыромятников уот оттон үрдүк айыылартан көрдөстө. Аалай лиэнтэни улуус баһылыгын солбуйааччы Юрий Дьяконов, Маймаҕа нэһилиэгин баһылыга Александр Егоров, саҥа дьиэ хаһаайына Тамара Горохова быстылар.
Эҕэрдэ тылларын Юрий Вячеславович, Александр Иванович эҕэрдэ тылларын тиэртилэр. Тутуу үлэтигэр докумуонуттан саҕалаан үлэҕэ киириэр диэри үлэлэспит дьоҥҥо махтал суруктарын туттардылар. Ону сэргэ хаһаайыттарга үөрүүлээх быһыыга-майгыга күлүүстэрин туттардылар.
Биир дойдулаахтарбытыгар Саҥа дьылы көрсө саҥа дьиэҕэ киирбиттэринэн истиҥ эҕэрдэбитин тиэрдэбит, дьоллоох-соргулаах олоҕу баҕарабыт!
Источник: https://t.me/namskiyulus/48937