Модут нэһилиэгэр 150 миэстэлээх оскуола тутуутун билистэ. Миэстэтигэр улуус баһылыгын э.т. Анатолий Павлов, улуустааҕы үөрэх салаатын салайааччыта Мария Игнатьева нэһилиэк баһылыга Ефим Гоголев, бэдэрээтчит «Намстрой» ХЭТ генеральнай директора Вадим Кутуков уонна үлэһиттэрэ буолан тутуу хаамыытын көрдөрөн кэпсээтилэр. Былаан быһыытынан бу сыл бүтүүтэ тутуу үлэтэ түмүктэниэхтээх.
Салгыы Намнааҕы техникумҥа сырыттылар. Быйылгы халаан уутун кэннэ чөлүгэр түһэрии үлэтэ хайдах ыытыллыбытын көрдүлэр-иһиттилэр. Директоры солбуйааччы Оксана Бочирова үөрэнэр куорпуска, уопсай дьиэлэргэ, үөрэх-лабораторнай комплексыгар уонна эт сыаҕын мастарыскыайыгар сырытыннаран сиһилии кэпсээтэ. Уопсайдарга чөлүгэр түһэрии үлэтэ былаан быһыытынан ыытыллыбыт. Оттон комплекска уонна мастарыскыайга капитальнай өрөмүөн тэтимнээхтик ыытылла турар.
Ол кэнниттэн Граф Биэрэгин «Ромашка» уһуйааныгар сырыттылар. Бу уһуйаан эмиэ быйылгы халааҥҥа улаханнык эмсэҕэлээбитэ. Өрөмүөн кэмигэр ыытыллан, билигин үлэ күөстүү оргуйа олорор. Уһуйаан сэбиэдиисэйэ Туйара Матвеева үлэ-хамнас күргүөмнээхтик ыытыллыбытын, спонсорскай көмө күүскэ оҥоһуллубутун туһунан кэпсээтэ.
Бу күн Е.М. Шапошников аатынан Хамаҕатта орто оскуолатыгар министр Нюргуна Афанасьевна кыттыылаах ГИА-ҕа үөрэнээччилэри хаачыстыбалаахтык бэлэмнээһин тула мунньах ыытылынна. Мунньахха СР үөрэҕин уонна наукатын министерствотын тэрилтэлэрин салайааччылара, улуус үөрэх тэрилтэлэрин директордара кыттыыны ыллылар.
Источник: https://t.me/namskiyulus/47621