Аммаҕа буолуохтаах Олоҥхо Ыһыаҕар 100 музыкант кырыымпаҕа оонньуура күүтүллэр. Ол туһугар 2020 сылтан мас уустара 70 кырыымпаны оҥорбуттар.
Сыл устата кырыымпаҕа маастар-кылаастары тэрийэн ыыппыттар. Ол курдук, манна Амматааҕы искусство оскуолатын преподавателя Василий Неустроев, «Кыл Саха» ансаамбыл салайааччыта Анна Томская, Олоҥхо тыйаатырын артыыстара Айсен Кысылбаиков, Прокопий Сыроватскай кыттыыны ылбыттар.
Ыһыах кэмигэр норуодунай худуоһунньук Михаил Носов «Саха XVII-XX-с үйэтээҕи таҥаһа уонна симэҕэ» уруһуйдарын көрдөрүү былааннанар. Бырайыагы 2021 сыллаахтан Амма 14 муниципальнай тэриллиитин уран уустара олоххо киллэрэллэр.
Бырайыак сыала — XVII-XX-с үйэҕэ саха омугун таҥаһын-сабын, симэҕин-киэргэлин, туттар тэрилин майгыннатан дьон-сэргэ дьүүлүгэр таһаарыы.