Олоҥхо ыһыаҕын уонна Туймаада ыһыаҕын үгэс курдук эрдэ былааннаммыт күннэргэ ыытыахтара. Бу туһунан култуура министиэристибэтэ иһитиннэрэр. «2021 сылга ыһыахтары тэрийии боппуруоһу эпидемиологическай балаһыанньаттан тутулуктаныаҕа. Билиҥҥи туругунан бу тэрээһиннэри көһөрүү туһунан боппуруос турбат», — диэн иһитиннэриигэ этиллэр. Олоҥхо ыһыаҕа бэс ыйын 19-21 күннэригэр Өлүөхүмэҕэ, Туймаада ыһыаҕа бэс ыйын 26-27 күннэригэр Дьокуускайга ыытыллыаҕа.
Олоҥхо ыһыаҕар биэс тыһыынчаттан тахса ыалдьыт уонна кыттааччы кэлэрэ күүтүллэр. Артыыстар булгуччулаах вакцинацияны ааһаллара ирдэнэр. Ыһыахха уопсайа 14 улахан куонкурус буолуоҕа.