«Cахафильм» уус-уран салайааччыта «Золотой ворон» киинэ бэстибээлигэр дьүүллүүр сүбэ бэрэссэдээтэлэ буолуоҕа

«Сахафильм» киинэ устуудьуйатын уус-уран салайааччыта Алексей Романов Чукоткаҕа ыытыллар «Золотой ворон» киинэ бэстибээлигэр дьүүллүүр сүбэ бэрэссэдээтэлэ буолуоҕа.

Тэрээһин бырагырааматыгар аан дойдуттан ооньуулаах, документальнай уонна анимационнай үлэлэр, ону тэҥэ Россия араас регионнарыгар уһуллубут киинэлэр киирбиттэр. Муус устар 24 күнүгэр бэстибээл куонкурус таһынааҕы нэдиэлэтэ саҕаламмыт.

Норуот икки ардыларынааҕы күрэскэ тоҕус толору усталаах киинэни көрдөрүөхтэрэ — олорго Дарья Хренова «Незамерзающий порт Надежды» Аҕа дойду сэриитин алдьархайын туһунан документальнай киинэтэ, «Семь дней осени» Алексей Головков Үөһээ Дьааҥы хайаларын уһугар икки киһи олоҕун туһунан, «Святой Архипелаг» Сергей Дебижев Соловков историятын туһунан кэпсиир киинэтэ көстүөхтэрэ.

Оонньуулаах күрэс кыттааччыларын икки ардыларыгар үс аан дойду араас муннуктарыгар олорор оҕолор дьылҕаларын туһунан — Ван Чун «Мороженое со вкусом сладкого картофеля» (Кытай) киинэтэ, Мехди Хоссейниванд Аалипур «Астероид» (Иран), Файзулло Файза «Водный мальчик» (Таджикистан) киинэлэрэ көстүөхтэрэ. Ону таһынан, куонкуруска алтай тылынан бастакы киинэлэртэн биирдэстэрин билиһиннэриэхтэрэ.

Кылгас усталаах киинэлэргэ Россияттан, Непалтан, Ирантан, Таджикистантан, Кыргызстантан, Кытайтан, Казахстантан уонна Сербияттан уон документальнай уонна уон оонньуулаах хартыыналар киирбиттэр. Күрэс саҥа бырагырааматыгар 24 анимационнай үлэ киирбит.

Бэстибээл гран-при хаһаайынын үгэс быһыытынан көрөөччүлэр талыахтара, оттон сорох бириистэри профессиональнай дьүүллүүр сүбэ түҥэтиэҕэ. Алексей Романовы кытта уһун усталаах киинэлэри Иран кинематографа Бехруз Шоайби, Казахстан национальнай киинэтин өйүүр судаарыстыбаннай киинин стратегическай сайдыы хайысхатыгар бэрэссэдээтэл солбуйааччыта, продюсер Канат Торебуй, Кытай бэстибээлгэ продюсера Ли Юань, киинэ кириитигэ Егор Москвитин, «Ленфильм» киинэ устуудьуйатын сүрүннүүр эрэдээктэрэ, преподаватель Андрей Апостолов сыаналыахтара. Оттон бастыҥ кылгас усталаах хартыыналары Кытай продюсера Го Сюйан, артыыс Ксения Суркова, режиссер уонна араадьыйа ыытааччыта Иван Семиклетов талыахтара.

Киинэлэри көрүү таһынан норуот икки ардыларынааҕы култуураҕа үлэни бөҕөргөтөргө анаммыт бырагыраама буолуоҕа. Бэстибээл ыалдьыт-дойдутунан Кытай анаммыт, профессиональнай делегация бэрэстэбиитэллэрэ Россия кинематографтарын кытта уопсай киинэлэри оҥорон таһаарыыга мунньах ыытыахтара.