Хотугулуу Илиҥҥи федеральнай үнүбэрсиэккэ «Чинчийэбит уонна бырайыактыыбыт» («Исследуем и проектируем») үөрэнээччилэр бүтүн Россиятааҕы куонкурустарын түмүктүүр түһүмэҕэ саҕаланна, үрдүк үөрэх кыһатыгар туттарсалларыгар кыайыылаахтарга сэттэ, оттон призердарга биэс балл эбиллиэҕэ. Бу туһунан үнүбэрсиэт пресс-сулууспата иһитиннэрэр.
ХИФУ ректора Анатолий Николаев бэлиэтээбитинэн, «Исследуем и проектируем» куонкурус онус сылын ыытыллар.
«Куонкурус федеральнай таһымнаммыта олус үчүгэй. Бу бырагыраамата кэҥииригэр уонна кыттааччы ахсаана элбииригэр кыах биэрдэ. Билигин өрөспүүбүлүкэ таһыгар тахсаммыт, ХИФУ лицейин үөрэнээччилэрэ атын регион үөрэнээччилэрин кытта куонкурустаһар кыахтаннылар», — диэтэ ХИФУ ректора Анатолий Николаев.
Түмүктүүр түһүмэххэ уопсайа 96 үөрэнээччи кыттыаҕа. Кинилэр үс треккэ күрэхтэһиэхтэрэ: конференция, олимпиада уонна түөрт хайысханан кейс-турнир: физика уонна техническэй наукалар, математика уонна программирование, биология уонна география, химия уонна химическэй технология. Тэрээһин ахсынньы 9 күнүгэр диэри буолуоҕа. Түмүк икки лиганан тахсыаҕа: юниордар (8-9 кылаастар) уонна үрдүкүлэр (10-11 кылаастар).