Чурапчы нэһилиэгин баһылыга уопсастыбаннаһы кытта көрүстэ.

Бу күннэргэ «Чурапчы нэһилиэгэ» тыа сирин түөлбэтин баһылыга Владимир Сивцев, дьаһалта үлэһиттэрэ кэлэр 2025 сыл былааннаах үлэтин торумун бэлэмнииргэ ТОС салайааччыларын, түмсүү бэрэстэбиитэллэрин кытта көрсөн, кинилэр санааларын билистилэр, этиилэрин иһиттилэр. Бүгүн, ахсынньы 17 күнүгэр нэһилиэк общественнай түмсүүлэрин кытары көрүстэ.

Нэһилиэк баһылыга Владимир Сивцев «Чөл олох» сылыгар ыытыллыбыт үлэни-хамнаһы билиһиннэрдэ. Бу сылга дьон-сэргэ субуотунньуктарга, култуурунай дьаһалларга, күрэхтэһиилэргэ, үтүө санаа акцияларыгар көхтөөхтүк кыттыбыттарын бэлиэтээтэ.
Олохтоох көҕүлээһини өйүүр бырагырааманан, территориялары тупсаран оҥоруу курдук судаарыстыбаннай бырагыраамаларынан уулуссалары сырдатыы, тротуардары, суоллары оҥоруу, ырааһырдыы үлэлэрэ ыытыллыбыттарын сырдатта.
А. К. Софронов аатынан спортивнай киин кулун тутар ыйга үлэҕэ киириэҕиттэн араас хабааннаах күрэхтэһиилэр, тэрээһиннэр, успуорт араас көрүҥэр дьарыктар ыытыллан элбэх олохтооҕу хабан дьон сэргэхсийбитин, инникитин маассабай успуорт өрө тутуллуохтааҕын эттэ.
Маны сэргэ «Хаарбах туруктаах дьиэттэн көһүү» бырагыраамманан элбэх кыбартыыралаах таас дьиэ сотору кэминэн тутуллан үлэҕэ киириэхтээҕэ ахтылынна.
Мунньах бүтэһик боппуруоһунан үүнэр 2025 сылы туохха туһуламмыт сылынан биллэрэр туһунан кэпсэтиһии буолла.  2025 сылга Кыайыы 80 сыла туолар. Онон, түмсүүлэр бэрэстэбиитэллэрэ ырытыһыыга санааларын активнайдык эттилэр.
«Киирбит этиилэр уонна мунньах хаамыытыгар турбут боппуруостар сиһилии үөрэтиллэн, бигэргэнэн, сөптөөх быһаарыылар ылыныахтара», — диэн баһылык Владимир Сивцев мунньаҕы түмүктээтэ.
Үүнэр сыл туохха ананара, үгэскэ кубулуйбут 2024 сылы түмүктүүр тэрээһиҥҥэ биллэриллиэҕэ.
Туһуламмыт сыл хайысхатыгар болҕомто ууруллан, туһааннаах бырагыраамалар ылыллан, үлэ-хамнас ыытыллыаҕа.

«Чурапчы нэһилиэгэ» тыа сирин түөлбэтин дьаһалтата.

Источник: https://t.me/MunicipalformationChurapcha/7144

ТАР5АТ: