Бэҕэһээ, сэтинньи 19 күнүгэр, Дьаархан нэһилиэгин «Дьулуур» спорт манеһыгар Сунтаар улууһун үөрэнээччилэрин ортолоругар, саха төрүт оҕунан ытыыга «Байанай бэлэҕэ» күөн күрэх 3-с төгүлүн күүрээннээхтик буолан ааста. Арассыыйаҕа Дьиэ кэргэн уонна Саха сиригэр Оҕо саас сылларыгар анаммыт күрэхпит Бүлүчээнтэн, Куокунуттан, Сунтаартан уонна Дьаархантан 17 кыраҕы харахтаах ох сааннан ытааччылары муста. Маны сэргэ, Сунтаар улууһугар аан маҥнайгытын саха төрүт оҕунан дьиэ кэргэнинэн ытыы күрэҕэ ыытылынна. Манна Куокуну, Дьаархан нэһилиэгиттэн уопсайа 5 дьиэ кэргэн хамаандата илин-кэлин түсүһэрдии ох курдук оҥостон, кустук курдук куоһанан, сахалыы таҥнан-симэнэн кытыннылар. Сунтаартан оҕунан ытыыга 2-с спортивнай разрядтаах, улууспут биир киэн туттар охчута Нелли Лукина кэлэн кыттыыны ылбыта, күрэхпит таһымын өссө күүркэтэн биэрдэ.
Күрэх үөрүүлээх аһыллыытыгар Саха сирин охчуттарын гимнэ буолбут, Сунтаар улууһун киэн туттар киһитэ В.В.Коротов «Саха охчута» ырыата тыаһаата, Дьаархан нэһилиэгин баһылыга Петр Тимофеев кэлбит охчуттары эҕэрдэлээн туран, ким бэлэмнээх ол кыайдын диэн баҕа санаатын эттэ. Оскуола дириэктэрэ Николай Охлопков төрүт оҕунан ытыыга өссө күүскэ дьарыктаналларыгар баҕарда уонна үөрэнээччилэр бу көрүҥҥэ дьаныһан дьарыктаналларыгар анаан сөптөөх спортивнай инбэнтээри ылыахтаахтарын туһунан эттэ. Күрэх тэрийээччитэ, оскуола физическэй культураҕа учуутала, оҕунан ытыы тириэнэрэ Павел Кырелов кылгастык күрэх хаамыытын билиһиннэрдэ. Оҕолор үс бөлөххө арахсан ыттылар. Ол курдук, бастакы бөлөххө 13 уонна 18 саастарыгар диэри уол, кыыс, иккис бөлөххө кыргыттар уонна үһүс бөлөххө уолаттар буолан күөн көрүстүлэр.
Түмүккэ, бастакы бөлөххө 1 м. Айта Глухарева (Бүлүчээн), 2 м. Айта Семенова (Дьаархан), 3 м. Проня Сергеев (Дьаархан) буоллулар. Оҕолор бастакы мэтээллэрин түөстэригэр кэтэн олус үөрдүлэр, долгуйдулар. Иккис бөлөххө 1 м. Нелли Лукина (Сунтаар), 2 м. Айыына Семенова (Дьаархан), 3 м. Айгыына Павлова (Дьаархан). Кыргыттарга бастыҥ көрдөрүүлээх Нелли Лукина оскуолабыт директора Николай Николаевич туруорбут анал бирииһин тутан үөрүүтэ үксээтэ. Үһүс бөлөххө 1 м. Вадим Пахомов, 2 м. Кэскил Иванов, 3 м. Арылхан Кириллин үһүөн Дьаархан орто оскуолатын үөрэнээччилэрэ иннилэрин кимиэхэ да биэрбэтилэр. Уолаттарга бастыҥ көрдөрүүлээх Вадим Пахомов Павел Револьевич туруорбут анал бирииһин тутан үөрдэ.
Оҕолор ытыыларын кэннэ кэтэһиилээх дьиэ кэргэнинэн хамаанданнан ытыы буолла. Ыалларбыт сэрэбиэй быһыытынан киирэн 5 тии ытыыны ыттылар. Ыалларга ыалдьааччылар элбэхтэр бэл, харчыга уксуу кытары тэриллиннэ. Инньэ гынан, кыттааччыларга эппиэтинэс икки бүк улаатта. Түмүккэ 1 м. Айгыына, Екатерина, Арсен Павловтар 12 очукуолаах таҕыстылар. 2 м. Айыына, Мария, Игнат Семеновтар 10 очукуолаах таҕыстылар. 3 м Кэскил, Татьяна, Геннадий Ивановтар 4 очукуолаах тахсан бириистээх миэстэни ыллылар. Бу үс ыал үһүөн Дьаархан нэһилиэгиттэн кытыннылар. 4 м. Анжелина, Наталья, Алексей Петровтар Куокуну нэһилиэгиттэн. 5 м. Күндүлээнэ, Анна, Прокопий Семеновтар ыллылар. Кыттыбыт дьиэ кэргэн бары Сунтаар улууһун баһылыгын социальнай боппуруостарга уонна имиджевай бэлиитикэҕэ солбуйааччыта Альберт Иванов туруорбут сыаналаах бириистэрин тутаннар үөрүүлэрэ үксээтэ. Ону таһынан, үлэлиир тэрилтэлэрэ, дьонноро туруорбут анал бириистэрин эбии тутаннар күрэх үөрүүтүн биллилэр. Наҕараадалааһын кэннэ тутатына үгэс буолбут күрэх муҥутуур кыайыылааҕын быһаарар ытыылар буоллулар. Бу манна барыта 14 кыттааччы суруйтаран усунуос төлөөн кытыннылар. Бииртэн биир сыыһа ыппыт күрэхтэһээччи көрөөччүгэ кубулуйан истэ. Түмүккэ Күндүлээнэ Маркова уонна Вадим Пахомов хааллылар. Бастакы ытыыларыгар тииҥнэрин иккиэн сыыстылар, оттон иккис ытыыга Вадим таба ытан күрэхпит муҥутуур кыайыылааҕа үрдүк ааты сүгэн харчыннан, түөскэ кэтэр олус астык оҥоһуулаах мэтээли сэргэ туоһу суругунан наҕараадаланна. Күрэхпит ити курдук түмүктэннэ, кыттааччылар аны хаһан күрэх буоларый диэбитинэн тарҕастылар.
Түгэнинэн туһанан, Сунтаар улууһун баһылыгын социальнай боппуруостарга уонна имиджевай бэлиитикэҕэ солбуйааччыта Альберт Ивановка, Сунтаар улууһун саха төрүт оҕунан ытыы федерациятын салайааччыта Артем Яковлевка, улууспут успуорт отделын салайааччытыгар Дьулустаан Егоровка, улууспут оҕунан ытыы тириэнэрдэригэр Ньургуйаана Петроваҕа, Наталья Федороваҕа уонна дьүүллүүр сүбэҕэ, сэкэритээргэ кэлэн үлэлэспит Ньургун Пахомовка, Алена Новгородоваҕа, Дьаархан нэһилиэгин баһылыгар Петр Тимофеевка, «Одун» НАК бары үлэһиттэригэр бу күрэхпит үрдүк таһымҥа ааһарыгар күүс — көмө буолбуккутугар барҕа махтал тылларын этэбит.
Источник: https://t.me/suntaar_sonunnara/19443