Дьокуускайга «Сүрэхтэн сүрэххэ» ОВЗ-лаах оҕолорго анаан бэстибээл саҕаланна

Дьокуускай куоракка «Биир ньыгыл Россия» региональнай ситэриилээх кэмитиэтин көҕүлээһининэн доруобуйаларыгар хааччахтаах оҕолорго анаан «Сүрэхтэн сүрэххэ» бэстибээл саҕаланна.

Бу бастакы тэрээһин оҕо уһуйааннарын иитиллээччилэригэр анаан «Цунами добра» социальнай бырайыагы кытта тэриллибит. Уопсайа куорат 33 уһуйааныттан 250 оҕо кыттыбыт.

«Биир ньыгыл Россия» региональнай ситэриилээх кэмитиэтин салайааччытын солбуйааччыта Александр Федоров кэпсээбитинэн, бу бастакы киэҥ хабааннаах тэрээһин үлэтигэр «Биир ньыгыл Россия» баартыйа уопсастыбаннай өйөбүлүн штаба, «Харысхал» пуондата, СӨ уопсастыбаннай балаатата уо.д.а. кыттыспыттар.

Дьүүллүүр сүбэҕэ биллэр уопсастыбанньыктар, баартыйа куоластааһын иннинээҕи кыттыылаахтара Николай Бугаев, Андрей Новоприезжай, Гульжан Огонерова, Анжелика Андреева, Наталья Степанова киирбиттэр. Саамай ыарахана диэн лауреаттары, дипломаннары уонна номинаннары талыы. Ол эрээри, ким да бэлэҕэ суох хаалбат — бары кыттааччыларга спонсордар үчүгэй бириис туруорбуттар.

Николай Бугаев бэлиэтээбитинэн, маннык тэрээһиннэр оҕолорго уонна төрөппүттэргэ туһалаах.