Горнайга маҥнайгы өрөспүүбүлүкэтээҕи ойуулуктар бэстибээллэрэ ыытылынна

Бүгүн, муус устар 25 күнүгэр, Бэрдьигэстээххэ Ил Дархан гранын 2022 с. куонкуруһун кыайыылааҕа «Оҕолор сахалыы ойуулуктары оҥороллор» бырайыак чэрчитинэн «Айар Аартык» өрөспүүбүлүкэтээҕи сахалыы ойуулуктары көрүү бэстибээлэ буолан ааста.

Түөрт анал аакка 65 сайаапка киирбит. Бэстибээл балаһыанньатынан – ойуулук үс мүнүүтэттэн уһуна суох, сахалыы тылынан буолуохтаах.

Күрэх түмүгүнэн Гран-При хаһаайынынан «Кутуйахчаан» ойуулук ааптардара Бэрдьигэстээх А.Н. Осипов аатынан орто оскуола 2 «б» кылааһын үөрэнээччилэрэ Ирена Павлова, Элла Гермогенова, Динара Петрова буоллулар, салайааччы Агафья Андреевна Михайлова.