Нам, Өлүөхүмэ уонна Ньурба улуустарын халаан уутуттан эмсэҕэлээбиттэрэ 4000-тан тахса сайабылыанньаны түһэрбиттэр. Бу туһунан бүгүн, ыам ыйын 27 күнүгэр, СӨ Бырабыыталыстыбатын бэрэсээдээтэлин бастакы солбуйааччы Дмитрий Садовников иһитиннэрдэ.
Хаартыска: sakha.gov.ru
«Биир кэмнээх матырыйаалынай көмөнү аныырга сайабылыанньаны ылыы «Госуслуги» судаарыстыбаннай өҥө порталын нөҥүө оҥоһуллар. Билигин икки өҥөнү оҥорууга барыта 4213 сайабылыанньа киирдэ. Сайабылыанньа киириэҕиттэн 11 хонук устата олохтоох салайыныы уорганнарын түмүктэригэр олоҕуран, экология министиэристибэтэ төлөбүрү аныыр эбэтэр аккаастыыр туһунан быһаарыы ылыныаҕа. Бу кэмҥэ суол инфраструктуратын уонна энергетика эбийиэктэрин чөлүгэр түһэрэр үлэлэр салҕаналлар, судаарыстыбаннай былаас уонна муниципальнай тэрилтэлэр бэрэстэбиитэллээх уорганнарын субуотунньуктара ыытылыннылар», — диэтэ Дмитрий Садовников.
Бастакы вице-премьер Айсен Николаев сорудаҕынан эмсэҕэлээбиттэргэ ананар төлөбүр кээмэйэ улаатыннарыллыбытын туһунан санатта. Ол курдук, биир киһиэхэ матырыйаалынай көмө кээмэйэ 5 тыһыынчаттан 10 тыһыынча солк. диэри үрдээбитэ, оттон бастакы наадалаах малы-салы сүтэрбиттэргэ 10 тыһыынчаттан 50 тыһыынча солк. диэри, толору сүтэрбиттэргэ — 20 тыһыынчаттан 100 тыһыынча солк. диэри улаатыннарыллыбыта.