Бэҕэһээ, ыам ыйын 24 күнүгэр Москваҕа «Иччи» саха мистическэй киинэтин сүрэхтэниитэ буолла.
Киинэҕэ өр кэмҥэ иччитэх турбут сиргэ, саҥа көһөн кэлбит сүөһү иитиитинэн дьарыктанар дьиэ кэргэн туһунан кэпсэнэр. Былыр манна баай сэниэ ыал олорбут эбит, ол эрээри биир дьикти түбэлтэ кэнниттэн олохтоохтор бары мантан көһүтэлээбиттэр. Дьон көһөн кэлбитигэр, ол урут буолбут түбэлтэлэр бүгүҥҥү олоххо биллэн, дьиэ кэргэн дьылҕатыгар сабыдыаллыыллар.
Режиссер Костас Марсаан киинэни икки сыл устата устубут.
«Иччи» киинэ Россия бары улахан куораттарыгар прокакка ыам ыйын 27 күнүттэн тахсыахтаах. Ону таһынан киинэ омук киинэ тыйаатырдарыгар көстөрө былааннанар.
2020 сыл күһүнүгэр «Иччи» киинэни Лиссабоҥҥа Motelx норуоттар икки ардыларынааҕы кутталлаах киинэ бэстибээллэригэр, ону таһынан Каталонияҕа The Sitges киинэ бэстибээлин бырагырааматыгар көрдөрбүттэрэ. TVCO Италия хампаанньата саха киинэтин атын дойдуларга көрдөрөр быраабы ылбыта, оттон High Octane Pictures Америка хампаанньата АХШ уонна Канада дойдуларыгар киинэ дистрибьюторынан буолар хантараагы баттаабыта.