«Arctic Indigenous Film Fund» киинэ пуондатын амбассадордара «Игра престолов» сериалга Джейм Ланнистер оруолун оонньообут Николай Костер-Вальдау уонна Голливуд режиссера Балтазар Кормакур саха режиссера Эдуард Новиков саҥа бырайыагын өйөөтүлэр.
Бу туһунан «Сахафильм» киинэ хампаанньа бэйэтин Instagram аккаунугар иһитиннэрдэ. «На краю света» саха хартыынатын уһулар хамаанда бырайыагы сайыннарарга уонна киинэни уһуларга пуондаттан граны ылыаҕа.⠀⠀
Пуонда амбассадордара артыыс Николай Костер-Вальдау уонна режиссер Балтазар Кормакур Арктика төрүт норуоттарын киинэ аан дойдутааҕы пуондатын өйүүллэрэ кинилэргэ улахан чиэс уонна үөрүү буоларын эттилэр.⠀⠀
«Биһиэхэ барыбытыгар Арктиканы кытта дьоһун сибээс баар, онно ураты дьоҕурдаах талааннар баалларын билэбит. Төрүт омуктар саҥалара иһиллиэхтээх, уонна циркумполярнай регион саҥатыгар аан дойду көрбөтөх, истибэтэх олоххо суолталаах историялар бааллар. “Arctic Indigenous Film Fund” олохтоох норуоттар ахсааннарыттан кинематографистары өйүүр сыаллаах, бу ааптардары үбүлээһиҥҥэ итэҕэстэр туолуохтара диэн эрэнэбит», — диэн иһитиннэриигэ этиллэр.
«На краю света» бырайыак нуучча литературатын классига Н.С. Лесков биир ураты сэһэнигэр олоҕурар. Ааптардар уонна туруорааччылар Москватааҕы норуоттар икки ардыларынааҕы киинэ бэстибээлин Гран-при хаһаайыннарынан буолаллар: режиссер Эдуард Новиков, сценарист Семен Ермолаев-Сиэн Өкөр уонна оператор Семен Аманатов.
AIFF пуонда барыта Канадаттан, Гренландияттан, Норвегияттан уонна Саха сириттэн биэс бырайыагы сайыннарыыга бастакы граннары аныаҕа.
Эдуард Новиков үлэлэрин ахсааныгар Москватааҕы норуоттар икки ардыларынааҕы киинэ бэстибээлэ уонна элбэх норуоттар икки ардыларынааҕы киинэ бэстибээллэр кыайыылааҕа «Тойон кыыла» киирбит.