Ил Дархан Айсен Николаев Өлүөхүмэ улууһугар оробуочай сырыытын кэмигэр 1-кы Нөөрүктээйи сэлиэнньэтин олохтоохторун кытта көрүстэ. Көрсүһүү быстах олорор пууҥҥа тэрилиннэ.
Бүгүҥҥү күҥҥэ дьон олорор дьиэлэрэ ууттан бары босхолоннулар. Хамыыһыйа хоромньуну ааҕар. Миэстэтигэр дириэксийэ исписэлиистэрэ үлэлииллэр. Сэрэдэҕэ Өлүөхүмэтээҕи тиэхиньикум устудьуоннарын этэрээтэ олохтоохторго көмөлөһө кэлэрэ былааннанар.
Быстах олорор пууҥҥа 30 киһи олорор, ол иһигэр уон оҕо баар. Кинилэргэ анаан итии аһылык астанар, бастакы туттар малларынан хааччыллыбыттара.
Олохтоохтор үксүн үп туһунан ыйыталлар. Айсен Николаев материальнай уонна үп өттүнэн көмө суһаллык уонна толору кээмэйдээхтик көрүллүөҕэ диэн бэлиэтээтэ. Муниципальнай оройуоҥҥа үбүлээһин көрүллэр, ол суотугар нэһилиэнньэни тутуу матырыйаалларынан хааччыйыахтара.
«Ыксаллаах быһыыга-майгыга эмсэҕэлээбит бары олохтоохторго биир кэмнээх материальнай уонна үп өттүнэн көмө оҥоһуллуоҕа. Көмө өрөспүүбүлүкэ бырабыыталыстыбатын эрэсиэрбэлиир пуондатыттан суһаллык көрүллүөҕэ», — диэтэ Айсен Николаев диэн СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.