Кини СӨ салалтатын уонна бэйэтин аатыттан дьону-сэргэни, наука бэрэстэбиитэллэрин бүгүн бүтүн Росси үрдүнэн Наука күнэ бэлиэтэнэринэн эҕэрдэлээтэ.
«Учуонайдарбытыгар, чинчийээччилэрбитигэр махтал тылбын тиэрдэбин. Кинилэр наука араас өттүгэр саҥа технологиялары айаллар, ыарахаттардаах боппуруостары чинчийэллэр, дьон-сэргэ олоҕун тупсарар инниттэн үлэлэһэллэр, өрөспүүбүлүкэ экономикатын сайыннараллар. Биһиги эһигинэн киэн туттабыт!», – диэн Ил Дархан эттэ.
Кини бэлиэтииринэн, Саха сиригэр наука өттүгэр киэн хабааннаах үлэ ыытыллар. Бу үлэ дойдуга уон сыл устата наука уонна технология сыллара биллэриллибит чэрчитинэн барар.
Ол курдук, 2023 сылга «100 вопросов ученому», «Ни дня без науки», «Ученые в школы» аахсыйалар уонна устудьуоннар наукаҕа түмсүүлэрин күрэхтэрэ ыытылыннылар. «Наука 0+» сыллата ыытыллар бэстибээл сүрүн тэрээһининэн буолар. Уопсайа тэрээһиннэргэ 20 тыһ тахса дьон кытынна.
Санатарбыт курдук, ааспыт сылга эдэр учуонайдарга Ил Дархан уон грана бэриллибитэ. Онтон исписэлиистэргэ, устудьуоннарга бырайыактарын олоххо киллэрэллэригэр — 500 тыһ солк. Ону таһынан биэс мөл солк суумалаах граны СӨ эдэр учуонайдарын өйүүр наука үөрэхтээһинин пуондата ылла.
«Бүгүҥҥү күҥҥэ Россия наукаҕа уонна тиэхиньикэҕэ аан дойдуга лиидэр буоларга дьулуһар. Наука биһиги дойдубут сайдыытыгар сүрүн суолталаах, онтон сиэттэрэн мин бэйэбит учуонайдарбытын үлэлэрин салҕыылларыгар уонна наука үрдүк чыпчаалын ситиһэргэ ыҥырабын», – диэн Айсен Николаев эҕэрдэтигэр бэлиэтээтэ.