СӨ Ил Дархана Айсен Николаев Нам улууһугар оробуочай сырыытын чэрчитинэн, Хатырык олохтоохторун кытары көрсүһүү тэрийэн ыытта.
Мунньах халаан уутуттан эмсэҕэлээбиттэргэ анаан тэриллибит быстах кэмҥэ олордор пууҥҥа ыытылынна. Пуун М.К. Аммосов аатынан Хатырык орто оскуолатыгар тэриллиннэ. Билигин быстах кэмҥэ олорор пууҥҥа 140-ча киһи олорор. Кинилэр итии аһылыгынан, иһэр уунан, аһынан-үөлүнэн, бастакы наадалаах малларынан толору хааччыллыбыттар.
Хаартыска: Андрей Сорокин, СИА
Айсен Николаев нэһилиэнньэни кытта көрсөн кэпсэтиигэ халаан уутуттан эмсэҕэлээбиттэргэ матырыйаалынай уонна гуманитарнай көмө толору кээмэйинэн оҥоһулларын бэлиэтээтэ.
«Бары наадалаах көмөлөр оҥоһуллалларыгар эрэллээх буолуҥ. Халаан содулуттан чөлүгэр түһэрии үлэлэрэ саҕаланна – сарсыардаттан Хатырыкка диэри суол аһылынна, салгыы суол үлэлэрэ салҕанан барыахтара. Бу күннэргэ халаан уутуттан хоромньуну сыаналааһын толору ыытыллыаҕа уонна кэмпэнсээссийэ төлөбүрдэрин түһэриитэ саҕаланыахтара», — диэтэ Айсен Николаев.
Хаартыска: Андрей Сорокин, СИА
Ону сэргэ Ил Дархан 1990- с сылларга нэһилиэги салайбыт Хатырык сэлиэнньэтин 87 саастаах аҕам састаах Данил Данилович Пахомовтыын көрсөн кэпсэттэ. Аҕам саастаах урут маннык үрдүк таһымнаах халаан уута тахсыбатаҕын бэлиэтээтэ.
Билигин Саха сиригэр быстах кэмҥэ дьону олордор 20 пууннара Нам, Өлүөхүмэ уонна Орто Халыма оройуоннарын 18 нэһилиэнньэлээх пууннарыгар үлэлииллэр. Дьону эвакуациялыырга эрдэтинэ барыта быстах кэмҥэ олордор 23,2 тыһыынча миэстэлээх 267 пуун бэлэмнэммитэ.
Хаартыска: Андрей Сорокин, СИА
Айсен Николаев өрөспүүбүлүкэ уонна муниципалитеттар былаастарын уорганнарын иннигэр нэһилиэнньэлээх пууннарга халаан уутун куттала суох ааһыытын хааччыйар соругу туруорда. Кини дьон олоҕор уонна доруобуйатыгар кутталы үөскэппэт туһугар бары дьаһаллары ылынарга, ону тэҥэ бу сытыы боппуруос олоҕу хааччыйарга, экэниэмикэ сайдарыгар сүҥкэн суолталааҕын бэлиэтээтэ.
Хаартыска: Андрей Сорокин, СИА
Саха сирин өрүстэригэр гидрологическай балаһыанньатын кэтээн көрүүгэ 200-тэн тахса гидрологическай постар тэриллибиттэрэ, ону тэҥэ бу сыалга пилота суох, анал уонна гражданскай авиациялар үлэлиэхтэрэ. Ыытыллыбыт дьаһалларынан Өлүөнэ, Алдан, Халыма, Амма, Ньурба, Токо өрүстэригэр муус туругун мөлтөтүү үлэтэ барбыта. Бу үлэлэр ыксаллаах быһыы- майгы эрэсиимин учуоттаан туран, быыһааччылар күүстэринэн билигин да салҕаналлар.
СӨ Ил Дарханын уонна Бырабыыталыстыбатын пресс-сулууспата