Тохсунньу 20 күнүгэр Мэҥэ Хаҥалас улууһугар Zoom платформанан «Саха олоҕун оҥкула» диэн бырагыраама торумун култуура эйгэтин үлэһиттэрэ дьүүллэстилэр. Кэпсэтиини «Олоҥхо дьиэтэ» норуот айымньытын дьиэтин салайааччыта Евдокия Иванова иилээн-саҕалаан ыытта.
Россия норуоттарын култуураларын нэһилиэстибэтин сылыгар тирэҕирэн оҥоһуллубут бырагыраамаҕа улуус биир кэлим этнокултуурнай сайдыытын кэнсиэпсийэтин олоххо киллэрэр хайысхалар чопчуланнылар. Дьиэ кэргэнтэн, үлэ тэрилтэлэриттэн саҕалаан уопсастыбаннай түмсүүлэри хабан үлэлэтии боппуруоһун ырыттылар. Манна хас биирдии нэһилиэккэ баар саха балаҕаннарын оруолун бэлиэтээтилэр.
«Омукка итэҕэл, норуот үгэһин иитэр-үөрэтэр суолтатын өрө тутан саха балаҕаннарын үлэтин сүрүннүөххэ», — диэтэ Евдокия Иванова.
Култуура эйгэтин үлэһиттэрэ сиэргэ-туомҥа, балаҕан ис барааныгар улахан болҕомто уурар наадалааҕын бэлиэтээтилэр. Олоҥхону истиини тэрийии, ыраастаныы, алгыс ылыы тиэмэлэрин таарыйдылар.