Москваттан Симферопольга көтүү: билиэт харчытын төннөрөллөр

Арассыыйа уонна Украина сыһыаннаһыыларыттан сылтаан, Росавиация иһитиннэриитинэн,  Ростовскай, Белгородскай, Курскай, Воронежскай уобаластарга, Краснодарскай кыраайга, Ставрополье, Калмыкия уонна Крым аэропортара  үлэлэрэ олунньу 24 күнүттэн кулун тутар 1 күнүгэр диэри тохтотуллубута.

Бу күннэргэ «Якутия» авиа-хампаанньа  баар балаһыанньаттан сылтаан, Москваттан Симферопольга  көтөр эриэйсэлэрин тохтоппута уонна  атыылаһыллыбыт билиэт харчытын барытын төннөрөрүн туһунан  тустаах хампаанньа  пресс-сулууспата иһитиннэрэр.

Анал иһитиннэриигэ Росавиация быһаарыытынан Арассыыйа соҕурууҥҥу авиарпортарыгар көтүү тохтообутунан сибээстээн, «Якутия» хампаанньа Москва-Симферополь хайысханан  көтүөхтээх эриэйистэрэ  олунньу 26 күнүттэн  кулун тутар 1 күнүгэр диэри тохтуулларын туһунан  этиллэр.  Ити хайысхаларга көтүүгэ уларыйыы киирбитэ саайтарыгар толору ыйыллар.