МС-21-300 сөмөлүөт Саха сиригэр тымныы усулуобуйаҕа бэрэбиэркэни ааһыаҕа

Дьокуускайга тохсунньу 23 күнүгэр Москва уобалаһын Жуковскай куоратыттан “Иркут” корпорация оҥоһуутун МС-21-300 сөмөлүөтэ кэллэ. Көтөр аал тымныы усулуобуйаҕа бэрэбиэркэни ааһыаҕа.

Бэрэбиэркэ сиргэ 30 °C тымныыга салгын суудуната көтүөн сөп типтээх сэртипикээтин улаатыннарар туһугар ыытыллар. Эрдэ сөмөлүөт систиэмэтэ 55 °C тымныыга диэри эрэсиимнээх былаһааккаҕа (на стендах) ситиһиилээхтик бэрэбиэркэни ааспыта.

Саха сирин тырааныспарын уонна суол хаһаайыстыбатын миниистирэ Владимир Сивцев МС-21-300 сөмөлүөтү салгыы биир кэлим Уһук Илиҥҥи хампаанньа иитинэн ылар былааннаахтарын, ол иһигэр өрөспүүбүлүкэҕэ дьону таһыыга анаан эмиэ диэн иһитиннэрдэ.

“Биһиги “Иркут” корпорацияны кытта бииргэ үлэлэһиигэ уонна олохтоох сөмөлүөттэри көтүтүүгэ интэриэстээхпит, чуолаан, Уһук Илиҥҥи авиахампаанньа биир кэлим састаабыгар. Биһиги өрөспүүбүлүкэбит айылҕатын килиимэтин усулуобуйатыгар авиация тиэхиньикэтин тымныыга бэрэбиэркэлиир кыах баар. “Дьокуускай” аэропордугар бу иннинэ «Суперджет 100», Ил-96, Бе-200 салгын суудуналарын, ону тэҥэ, Airbus уонна Boeing хампаанньалар сөмөлүөттэрэ бэрэбиэркэни ааспыттара”, — диэн кини эттэ.

Тургутууну ыытарга МС-21-300 сөмөлүөтү бэрэбиэркэлииргэ Дьокуускайга 70 киһилээх бөлөх кэллэ – “Иркут” корпорация уонна А.С. Яковлев аатынан уопуттуур-конструкторскай бүрүө исписэлиистэрэ. Кинилэр Дьокуускайга үс нэдиэлэ устата үлэлиэхтэрэ.

“Бу, икки төрүөтү бииргэ холбоон бастакы көтүү буолар – Жуковскай куораттан ыйыллыбыт пууҥҥа диэри ырааҕа уонна элбэх дьонноох уһуннук көтүүнү тупсаҕайдык хааччыйыытынан сөмөлүөт систиэмэтин үлэтин кыаҕын бигэргэтии. 30 кыраадыс тымныылаах салгын температуратыгар сөмөлүөтү үлэлэтии кыаҕын улаатыннарыыга тургутуу ыытыллыаҕа. Бу МС-21-300 былырыын ылыллыбыт сэртипикээтин үлэтин салҕааһын буолар. Сэртипикээти кэҥэтэр туһугар бэрэбиэркэлэри ыытыахтаахпыт уонна сыл бүтүөр диэри “Арассыыйа” авиахампаанньа туһанарыгар бастакы сиэрийэ массыыналары тиксэриэхтээхпит”, — диэн “Иркут” корпорация генеральнай дириэктэрэ, Гражданскай авиация холбоһуктаах авиастроительнай корпорациятын генеральнай дириэктэрин солбуйааччы  Андрей Богинскай кэпсээтэ.

А.С. Яковлев аатынан уопуттуур-конструкторскай бүрүө салайааччыта Даниил Бренерман эппитинэн, МС-21-300 Жуковскайтан Дьокуускайга диэри туох даҕаны бэлиэтээһинэ суох көппүт.

“Сиргэ уонна салгыҥҥа бэрэбиэркэлэр Саха сиригэр халлаан туругуттан көрөн быһа холуйан үс нэдиэлэ устата барыахтара. Тургутуу хас түһүмэҕин аайы сөмөлүөт киэһэтин уонна түүнүн 12 чаас устата аһаҕас халлаан анныгар туруоҕа. Бэрэбиэркэҕэ тэрээһин уонна тиэхиньиичэскэй өртүнэн “Дьокуускай” аэропорт уонна “Якутия” авиахампаанньа өйүүр”, — диэн кини эттэ.

Санатан эттэххэ, бу күннэргэ РФ бырабыыталыстыбатын бэрэссэдээтэлэ Михаил Мишустин гражданскай сөмөлүөтү оҥоруу уонна гражданскай авиация пааркатын саҥардыыны сайыннарыы мунньаҕын ыыппыта. Кини аны биэс сылынан олохтоох бырамыысыланнас сылга 100-тэн тахса гражданскай сөмөлүөтү оҥорон таһаарыаҕын бэлиэтээбитэ. Арассыыйатааҕы авиа бырамыысыланнаһын өйүүргэ үс сыллаах бүддьүөккэ 45,5 млрд. солк. тахса үп угуллубут.

Ыспыраапка:

МС-21-300 – орто көтүүлээх (среднемагистральный), 163-211 киһиэхэ диэри дьону таһар аныгы көлүөнэ лайнера. Тустаах сөмөлүөтү “Иркут” научнай-оҥорон таһаарар корпорация оҥорор. 2021 сыл ахсынньытын бүтүүтэ МС-21 Росавиация сэртипикээтин ылбыта, итиэннэ сөмөлүөттэри быйыл “Арассыыйа” авиахампаанньаҕа тиэрдиэхтэрэ.

 

СӨ Ил Дарханын уонна СӨ Бырабыыталыстыбатын пресс-сулууспата.

Мария ВАСИЛЬЕВА, СИА хаартыскаҕа түһэриилэрэ.