Муус устар 10 күнүгэр, аан дойдутааҕы «Тотальнай дьыктаан» аахсыйа ыытылларынан өрөспүүбүлүкэ киин куоратыгар телебашня кыһыл өҥүнэн умайыаҕа. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Телебашня олохтоох бириэмэнэн, киэһэ 20:00-тан 21:00 чааска диэри сандаарыаҕа.
Бу күн Дьокуускай куорат аахсыйа ыытыытын киининэн буолуоҕа, өрөспүүбүлүкэ үрдүнэн 150-тан тахса былаһаакка үлэлиэҕэ.
Маны таһынан, Саха сирин олохтоохторо, муус устар 10 күнүгэр 13:00-тан муус устар 11 күнүн 06:00 чааска диэри totaldict.ru сайт нөҥүө суруйуохха сөп буолуоҕа. Быйыл «Тотальнай дьыктаан» бастакытын биэс чаастан туруоҕа, чааһынан балаһаҕа биирдии уонна онлайн-дьыктааҥҥа туспа тиэкис.
«Якутия 24» ханаал «Тотальнай дьыктаан-2021» аахсыйаны быһа көрдөрүөҕэ. Араас локациялартан быһа эпиир 13:30 чаастан саҕаланыаҕа уонна олохтоох бириэмэнэн 17:00 чааска диэри буолуоҕа.