«Сахафильм» киинэ хампаанньа «MUUS uSTAR» ыччат бэстибээлин чэрчитинэн кылгас кээмэйдээх киинэ сценарийын куонкуруһун биллэрдэ. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.
«Биһиги өрөспүүбүлүкэҕэ бастакытын кылгас кээмэйдээх киинэ сценарийын куонкуруһун ыытабыт. Өрөспүүбүлүкэҕэ киинэ салаата сайдан иһэрин туһугар интэриэһинэй историялаах, тус көрүүлэрдээх эдэр ааптардар наадалар. Бэстибээл чэрчитинэн саҥа ааттар тахсыахтара диэн эрэнэбит», — диэн хампаанньа дириэктэрэ Сардана Саввина кэпсээтэ.
Куонкурус кыайыылаахтара хампаанньаттан харчынан бириистэри, техническэй өйөбүлү ылыахтара диэн бэлиэтииллэр, ону тэҥэ 2022 сыл ахсынньытыгар «Киинэ Өрөспүүбүлүкэтэ» кылгас кээмэйдээх киинэ бэстибээлигэр кыттыахтара.
«MUUS uSTAR» бэстибээл чэрчитинэн саҥа саҕалаан эрэр сценаристарга маастар-кылаас ыытыллара былааннанар.
Куонкуруска 18-тан 35-гэр диэри саастаахтар кытталлар, уһуна 5-тэн 20 мүнүүтэҕэ диэри, үлэни олунньу 15 күнүттэн кулун тутар 15 күнүгэр диэри respublika.kino@yandex.ru электроннай аадырыска туталлар.