Нам улууһугар халаантан эмсэҕэлээбит 16 нэһилиэктэн сэттэтэ ууттан босхолонно — Аппааны, Бартыһаан, Фрунзе, Көбөкөн, Үөдэй, Никольскай, Кыһыл Дэриэбинэ. Онтон атын нэһилиэнньэлээх пууннарга уу таһыма түһэн эрэрэ бэлиэтэнэр диэн бүгүн, ыам ыйын 21 күнүгэр, Нам улууһун баһылыга Юрий Слепцов хамыыһыйа мунньаҕар иһитиннэрдэ.
«Бэҕэһээ Ил Дархан Айсен Николаев Нам улууһун Хатырык сэлиэнньэтигэр мунньахтаабыта. Ыстаап үлэтэ быһаарыллыбыта, ситэриилээх былаас уорганнарыттан эппиэтинэстээхтэри анаабыттара. Чөлүгэр түһэрэр үлэлэр ыытыллаллар. Өрөспүүбүлүкэ баһылыга эмсэҕэлээбит нэһилиэнньэҕэ төлөбүрү ыытары бастакы уочаратынан дьаһайарга сорудахтаата», — диэн СӨ гражданскай оборуона дьыалаларыгар уонна нэһилиэнньэ олоҕор куттал суох буолуутун хааччыйар миниистир Дмитрий Лепчиков эттэ.
Халаан уутуттан босхоломмут нэһилиэнньэлээх пууннарга сотору кэминэн дезинфекционнай биригээдэлэр үлэлэрин саҕалыахтара. Билигин уотунан, гааһынан хааччыйыы үлэтэ ыытыллар, суолу оҥороллор.