2023 сыл балаҕан ыйыгар Ил Дархан Айсен Николаев Оһуохай күнүн тэрийэр туһунан ыйаахха илии баттаабыта. Онон быйыл ыам ыйын 25 күнүгэр аан бастаан Оһуохай күнэ бэлиэтэниэҕэ.
Ааптар түһэриитэ.
Оһуохай күнүн тэрээһиннэрин торумнуур пресс-кэмпириэнсийэни СӨ Култуура уонна духуобунай сайдыы министиэристибэтэ тэрийдэ. Култуура, духуобунай сайдыы миниистирин солбуйааччы Мария Турантаева, «Оһуохай» түмсүүнү салайааччы Александр Данилов, Аар Дархан этээччилэр, түмсүү чилиэннэрэ, суруналыыстар кытыннылар.
— Оһуохайбыт судаарыстыбаннай таһымҥа тахсыбытыттан олус үөрэбит, Ил Дархаҥҥа махтанабыт. Оһуохай диэн итэҕэлбит көстүүтэ. Биир киһи тыл күүһүн туһанан алгыс этэр, Үрдүк Айыыларга үҥэр, ону атыттар үтүктэллэр, бары тутуспутунан биир сомоҕо буолаллар, күүс-уох ылаллар. Онон оһуохай норуоту сомоҕолуур. Тыллаах, сирдээх, итэҕэллээх буоллахпытына, сахалар өлөн-охтон биэриэхпит суоҕа, сайдыы кэлиэҕэ, ахсаан өттүнэн эбиллиэхпит, — диэн Александр Джурович эттэ.
Мария Турантаева министиэристибэҕэ оһуохайы сүрүннүүр буолбут. Оһуохай этээччилэр киниэхэ улаханнык эрэнэллэрин билэрдилэр.
— Бырабыыталыстыбаҕа Сергей Местников салайааччылаах тэрийэр хамыыһыйа бигэргэннэ. Элбэх тэрээһиннэр былааннаннылар. 5 сылга былаан оҥоһулунна. Мантан ыла үлэ күөстүү оргйуохтаах. Хас биирдии нэһилиэккэ оһуохай этээччи дьон баар буолуохтара. Түмсүү кыттыылаахтара кинилэри үөрэтэргэ бэлэмнэр. Оһуохай күнүгэр, Бүтэһик чуораан лыҥкыныыр кэмигэр бары оскуолаларга оһуохайдар тэриллиэхтэрэ. Бу оҕолору олох саҥа аартыгар атаарарга алгыс курдук буолуоҕа, — диэн кини эттэ.
Маны сэргэ, ыам ыйын 25 күнүгэр киэһэ 5 чааска Дьокуускай куоракка Доҕордоһуу болуоссатыгар Добун оһуохай буолуоҕа. Маассабай оһуохайга бар дьону ыҥыраллар. Кэлиҥ, Оһуохай күнүн бастакы бэлиэтээһин үөрүүтүгэр кыттыһыҥ!