Кулун тутар 16 күнүгэр Мэҥэ Хаҥалас улууһун «Олоҥхо дьиэтэ» оройуоннааҕы норуот айымньытын киинигэр Улуу Олоҥхону үйэтиппит, уһун тыыннаабыт Саха Саарына, РСФСР, Саха АССР үтүөлээх артыыһа, Саха АССР норуодунай артыыһа, П.А.Ойуунускай аатынан Судаарыстыбаннай бириэмийэ лауреата, Россия суруйааччыларын Сойууһун чилиэнэ, Гавриил Гаврильевич Колесов 90 сылын чэрчитинэн, кини аатын иҥэрии үөрүүлээх тэрээһинэ ыытылынна.
Тэрээһиҥҥэ Гавриил Гаврильевич оҕолоро, аймахтара, бииргэ үлэлээбиттэрэ, биир дойдулаахтара, суруйааччылар, олоҥхону үөрэтээччилэр муһуннулар. Олоҥхо дьиэтигэр Гавриил Колесов аатын иҥэрии туһунан 2022 сыл кулун тутар 4 күнүгэр Мэҥэ Хаҥалас улууһун дьокутааттарын 33-с сиэссийэтинэн бигэргэммитэ.
Үөрүүлээх тэрээһин алгыс сиэринэн-туомунан саҕаланна. Аан Дархан Олоҥхону толорооччу, алгысчыт Петр Максимович Тихонов: «Гавриил Колесов Саха киһитин ытык сыыппарата тоҕустаах эбит, төрөөбүт күнүттэн 9 күн кэннэ, Олоҥхо Дьиэтэ аанын арыйан үлэлээбитэ оруобуна 9 сылын туолуута кини албан аатын үйэтитэн Олоҥхо Дьиэтигэр иҥэрилиннэ,» — диэн алгыһын оҥордо.
«Үөрүүлээх тэрээһиҥҥэ Мэҥэ Хаҥалас улууһун баһылыгын I-кы солбуйааччыта Семен Потапов, СӨ Судаарыстыбаннай мунньаҕын бэрэссэдээтэлин солбуйааччы, Олоҥхону тэрийэр кэмитиэт бэрэссэдээтэлэ Александр Николаевич Жирков, СӨ судаарыстыбаннай уонна уопсастыбаннай деятелэ Матвей Васильевич Мучин, Саха академическай тыйаатырыттан бииргэ үлэлээбит, оонньообут коллегалара, артыыстар Ефим Степанов, Дьарааһын Васильев, Софья Баранова, Анатолий Николаев, төрөппүт оҕолоро Оксана Гавриловна, Владимир Гаврилович Колесовтар, суруйааччылар Сойуустарыттан Сэмэн Тумат, Степан Сивцев, М.К.Аммосов аатынан ХИФУ профессора, биллэр көстөр учуонай, олоҥхону чинчийээччи Илларионов Василий Васильевич, Олоҥхо институтун салайааччыта Руслан Николаевич Анисимов, филологическай наука хандьыдаата Юрий Борисов, СӨ Олоҥхо Ассоциациятын Бэрэсидьиэнэ Февронья Шишигина, вице-бэрэсидьиэн Елена Протодьяконова, Олоҥхо кииниттэн Зоя Сысолятина, Ульяна Флегонтова, СӨ Олоҥхо тыйаатырын салайааччыта Мария Турантаева, улууспут салайааччылара кыттыыны ылан, санаа атастаһан, инники Гавриил Колесов аатын үйэтитиигэ ыытыллыахтаах үлэни, былааны кэпсэтэн, санааларын үллэһиннилэр. Тэрээһиҥҥэ улууспут дьоно-сэргэтэ көхтөөхтүк кыттыыны ылбыттарыттан олус диэн үөрдүбүт. Киэҥ туттар биир дойдулаахпыт үтүө аата үйэтитиллэн, улууспут олохтоохторун, ыалдьыттары улууспут килбэйэр киинигэр, үс аартык силбэһэр сиригэр уруйдуу-айхалыы көрсүөҕэ, күн аайы аата ааттана туруоҕа!» — диэтэ Мэҥэ Хаҥалас улууһун култуураҕа уонна духуобунай сайдыыга салалта начальнигын солбуйааччыта Надежда Максимова.