«Пушкинскай каарталаахтар» 2022 сыл култуурунай тэрээһиннэригэр билиэт ылыахтарын сөп. Бу туһунан СӨ култуура уонна духуобунай сайдыы министиэристибэтин пресс-сулууспата иһитиннэрэр.
Ол курдук, бырагыраама афишатыгар үүнэр сыл бастакы кыбаарталыгар буолуохтаах опера уонна балет судаарыстыбаннай тыйаатырын испиктээкиллэрэ уонна «Россия — мин историям» историческай паарка быыстапкалара билиннилэр.
«Картаҕа баар үс тыһыынча солкуобайы бу дьыл ахсынньы 31 күнүгэр диэри туттуллуохтаах. Ыччат быйылгы да, кэлэр да сыл тэрээһиннэригэр билиэт ылыан сөп. Онон култуура тэрилтэлэрэ бырайыактарын өрөспүүбүлүкэ үөрэҕин тэрилтэлэригэр билиһиннэрэллэрэ, ыччат «Пушкинскай каартанан» туһаныытын көҕүлүүллэрэ наада», — диэтэ СӨ култуура уонна духуобунай сайдыы министиэристибэтин бастакы солбуйааччыта Владислав Левочкин.
Бу ый бүтүөҕэр диэри 50 тэрээһиҥҥэ сылдьыахха сөп — испиктээкиллэргэ, быыстапкаларга, маастар-кылаастарга, оптуобуһунан экскурсияларга уонна үөрэтэр бырагыраамаларга.
«Пушкинскай каарта» федеральнай бырайыак Россияҕа 2021 сыл балаҕан ыйыттан киирбитэ. Саха сиригэр бырагыраама кыттыылаахтарынан 11 судаарыстыбаннай профессиональнай үөрэх тэрилтэлэрэ, икки култуурунай-сынньанар киин уонна Миирнэй оройуонун култууратын управлениета буолбуттара.
Уопсайа бу бырайыагынан икки мөлүйүөн солкуобайтан тахса суумаҕа 4 310 билиэт атыыланна. Каартанан Дьокуускайга 142 киһи туһанар, Нерюнгрига — 38, Миирнэйгэ — 13, Өлүөхүмэҕэ — 16, Ленскэйгэ — 9.