Өрөспүүбүлүкэ киин куоратыгар «Россия-мин историям» историческай пааркаҕа «Тотальнай дьыктаан» үс былаһаакката тэрилиннэ. Бу туһунан тэрилтэ пресс-сулууспата иһитиннэрэр.
Муус устар 10 күнүгэр, аан дойдутааҕы «Тотальнай дьыктаан-2021» аахсыйа өрөспүүбүлүкэ 150 былаһааккатыгар ыытыллыаҕа, маны таһынан Дьокуускайга — 20-тэн тахса.
Аахсыйа сүрүн былаһааккатынан Өксөкүлээх Өлөксөй аатынан норуоттар доҕордоһууларын дьиэтэ буолуоҕа, онно тиэкис ааптара, Россия суруйааччыта Дмитрий Глуховскай, 14:00 чааска «Обещания» айымньытын быһа эпииргэ ааҕыаҕа.
«Якутия 24» ханаал «Тотальнай дьыктаан-2021» аахсыйаны быһа көрдөрүөҕэ. Араас локациялартан быһа эпиир 13:30 чаастан саҕаланыаҕа уонна олохтоох бириэмэнэн 17:00 чааска диэри буолуоҕа.
Аахсыйа ыытылларынан өрөспүүбүлүкэ киин куоратыгар телебашня кыһыл өҥүнэн сандаарыаҕа.
Кыттыан баҕалаах киһи totaldict.ru сайтка бэлиэтэнэр. Бэлиэтэнии хаамыытын ыйыллыбыт ссылканан киирэн көрүөххэ сөп.