Анаабыр улуһун Сааскылааҕар сааскы халаан балаһыанньата ыарахан. Анаабыр өрүскэ уу таһыма эбиэттэн киэһээҥи дааннайынан 1182 см (2 чаас иһигэр 2 см эбилиннэ) тиийэн, кутталлаах таһым кэрчигин ааста. Муус бытааннык устар.
Икки олорор дьиэни, аэропуорт оройуонугар барар массыына суолун, пуорт көтөр-түһэр балаһатын, бөһүөлэк иһинээҕи суолун уу ылла. Бөһүөлэккэ 104 миэстэлээх 3 быстах олорор пуун баар. Билиҥҥитэ онно 18 киһи, ол иһигэр 5 оҕо киирдэ.
Хаартыска: СӨ Гражданскай оборуонаҕа уонна нэһилиэнньэ олоҕор куттал суох буолуутун хааччыйар министиэристибэтэ
Бүгүн сарсыарда өрөспүүбүлүкэ ыксаллаах быһыыга-майгыга хамыыһыйатын суһал бөлөҕүттэн 8 киһи, СӨ Быыһыыр сулууспатын уонна ЫБММ быыһааччылара икки бөртөлүөтүнэн мууһу дэлби тэптэрэр сириэстибэни илдьэ көппүттэрэ.
Хаартыска: СӨ Гражданскай оборуонаҕа уонна нэһилиэнньэ олоҕор куттал суох буолуутун хааччыйар министиэристибэтэ
Халыма-1 бөлөххө 23 киһи, 4 тиэхиньикэ, 2 салгын суудуната уонна 1 уу суудуната үлэлииллэр. Оттон Халыма-2 бөлөххө 8 киһи, 2 тиэхиньикэ уонна 1 уу суудуната үлэлиир.
Сааскылаах сэлиэнньэтин чугаһынан харыы тахсыбыт буоллаҕына, суһал бөлөх мууһу дэлби тэптэрэр үлэни ыытыаҕа диэн СӨ Гражданскай оборуонаҕа уонна нэһилиэнньэ олоҕор куттал суох буолуутун хааччыйар министиэристибэ пресс-сулууспата иһитиннэрэр.