СӨ Ыччат бырабыыталыстыбата Саха АССР төрүттэммитэ 100 сылыгар этиилэри уонна бырайыактары киллэрдэ. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.
«2022 сылга өрөспүүбүлүкэ ыччата култуура, спорт, үөрэх, туризм уонна тыа хаһаайыстыбатын эйгэтигэр 20-тэн тахса тэрээһини ыытыаҕа, айар ыччаты уонна эдэр ыаллары өйүүр бырайыактар олоххо киириэхтэрэ», — диэн иһитиннэриигэ этиллэр.
«Саха сирин билиэттэрэ» сахалыы быһыылаах, көстүүлээх билиэт дизайнын оҥорор куонкурус ыытыллар. Кыайыылаах дизайн «Аэропорты Севера» авиахампаанньа, филармония уонна тыйаатырдар билиэттэригэр туһаныллыаҕа. Куонкуруска кыттар үлэлэри тутуу олунньу 26 күнүгэр диэри салҕанар. Манна 16 саастарыттан 37 саастарыгар диэри дьон кыттыан сөп.
Бырайыактар ортолоругар өрөспүүбүлүкэ эдэр учууталларыгар грантовай куонкурус ыытыллар, нэһилиэктэр уулуссаларын Google Картаҕа оҥоруу, «Саха сирэ-2122» стратегияны ырытан оҥорууга ыччат форума буолуоҕа.
Ону таһынан, Ийэ сылыгар СӨ Ыччат бырабыыталыстыбата эдэр төрөппүттэргэ аналлаах көрдөрөр-иһитиннэрэр матырыйааллары оҥорон таһаарыаҕа. Оҕону былааннааһын, төрөтүү уонна иитии боппуруостарыгар толору иһитиннэриилэри порталга киллэриэхтэрэ.