Саха АССР 100 сылынан Россия куораттарыгар култуурнай-сырдатар тэрээһиннэр ыытыллыахтара, ол иһигэр — А.М. Горькай аатынан Приморскай кыраайдааҕы библиотекаҕа саха литературатын салаата арыллыаҕа. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Саха композитора Марк Жирков 130 сылынан Москва судаарыстыбаннай консерваториятыгар кэнсиэр буолуоҕа, Санкт-Петербург куоракка Петропавловскай кириэппэстэн ытыы оҥоһуллуо.
Үбүлүөйдээх сылга 70 кэриҥэ култуурнай-сырдатар регионнар икки ардыларынааҕы уонна өрөспүүбүлүкэтээҕи таһымнаах тэрээһиннэр ыытыллыахтара. СӨ бырабыыталыстыбатын бэрэссэдээтэлэ Андрей Тарасенко бэлиэтээбитинэн, сүрүн сорук — үбүлүөйдээх тэрээһиҥҥэ өрөспүүбүлүкэ дьонун-сэргэтин кытыннарыы.
СӨ култуура уонна духуобунай сайдыы министиэристибэтэ иһитиннэрэринэн Саха АССР 100 сылынан ыытыллар федеральнай былаан чэрчитинэн Россия Улахан академическай судаарыстыбаннай тыйаатырын гастрола буолуоҕа, сайын Третьякоскай галерея уонна Александринскай тыйаатыр экспонаттарын быыстапката тэриллиэ.
Федеральнай ханаалларга Саха сирин историятын туһунан документальнай киинэлэр көстүөхтэрэ.
Россия бэрэсидьиэнэ Владимир Путин ыйааҕынан өрөспүүбүлүкэ бэлиэ сыла бүтүн Россиятааҕы таһымнанна.