Саха киинэтэ Азия дойдуларын прокатыгар тахсар чинчитин көрөбүт — НВК Саха

Сардана Саввина саха киинэтин Азия ырыынагар таһаарар былааннаҕын кэпсээтэ.

Бу туһунан «Дьокуускай — креативнай индустрия сайдар киинэ» АГИКИ сессиятыгар иһитиннэрдэ. Ол Орто, Арҕааҥҥы-Илиҥҥи дойдулар уонна атын Азия регионнара. Ол курдук, «Сахафильм» дириэктэрэ этэринэн, саха киинэтэ — Азия киинэлэригэр киирсэр, ол иһин ырыынакка тахсан ситиһиилэниэн сөп.

Ону тэҥэ кини саха киинэтэ биир даҕаны академическай оскуолата суоҕун бэлиэтээтэ.

«Биһигиттэн элбэхтэ ыйыталлар: эһиги академическай оскуолаҕыт ханныгый? Онуоха биһиги сорох артыыстарбыт ВГИК-ка, сорохтор Санкт-Петербурга уо.д.а. үөрэхтэргэ үөрэммиттэрин кэпсиибит. Өрөспүүбүлүкэҕэ тус академическай оскуола олохтуур кэм тосхойдо. Инникитин АГИКИ «Киинэ» салаатын бүтэрбит оҕолор ситиһиилээх бородууксуйа оҥорон таһаарбыттарын туһунан истэргэ үчүгэй буолуо этэ», — диэн Сардана Саввина эттэ.

Кини АГИКИ «Киинэ» хайысхатын сайыннарарга көҕүлээһиинин өйүүрүн уонна Сахафильмы кытта бииргэ үлэлииргэ бэлэмин туһунан эттэ.