Саха сирин режиссера Владимир Мункуев «Нуучча» киинэтэ норуоттар икки ардыларынааҕы Карловы Вары куоракка ыытыллыбыт киинэ бэстибээлигэр East of the West куонкуруска Гран-при буолла.
Бу туһунан куонкурус Instagram аккауна иһитиннэрэр.
«“East of the West” куонкурус кыайыылаахтара. Эҕэрдэлиибит наҕараадаламмыт киинэлэри: гран-при – «Нуучча» (режиссер Владимир Мункуев)», – диэн иһитиннэриигэ этиллэр.
Гран-при үрдүк аатыгар 12 уус-уран киинэ кытынна.
Киинэ сюжета Польша суруйааччыта уонна этнограф Вацлав Серошевскай айымньыларыгар олоҕурда.
XIX-с үйэ бүтүүтүнээҕи Дьокуускай уобалаһа көстөр.
Киинэҕэ, иккис оҕолорун кистээн баран Саха сирин тыйыс айылҕатыгар уонна томороон тымныытыгар тыыннаах хаалаары салгыы туруулаһар Хабдьыйа уонна Кэрэмэс тустарынан кэпсэнэр.
Биирдэ олохтоох кинээс кинилэри кытта сокуон быһыытынан олоруохтаах Костя диэн нууччаныны аҕалар. Уопсай тылы булуу хара маҥнайгыттан табыллыбат, бу киһи бэйэтэ дьиэ хаһаайына буоларга сананар.
Влидимир Мункуевы Саха сирин Ил Дархана Айсен Николаев социальнай ситимҥэ эҕэрдэлээтэ.
«Режиссеру уонна уһулар хамаанданы эҕэрдэлиибин! Саха сирэ киэн туттар!», – диэн кини суруйар.
Карловы Вары куоракка ыытыллар киинэ бэстибээлэ – Европаҕа биир саамай эргэ, Каннскадааҕы бэстибээл курдук 1946 сылтан саҕалаан үлэлиир. 1960 сылга бэстибээл норуоттар икки ардыларынааҕы саамай үрдүк «А» бөлөххө көһөрүллүбүтэ.
Быйылгы көрүү сүрүн ыалдьыттарынан Америка артыыһа Джонни Депп, Британия артыыһа Майкл Кейн, ону тэҥэ Америка киинэ актера, режиссер уонна суруйааччы Итан Хоук буоллулар.