Саха сиригэр өрөспүүбүлүкэ норуоттарын төрүт култууратын күнүн олохтуохтара

Ил Дархан Айсен Николаев төрүт култуура түмсүүлэрэ, казачестволар уонна конфессиялар Саха өрөспүүбүлүкэтин норуоттарын төрүт култууратын күнүн олохтуур туһунан этиилэрин өйөөтө.

СӨ баһылыга Ассамблея чилиэннэрин кытта Норуоттар доҕордоһууларын дьиэтигэр көрүстэ.

«Норуоттар төрүт култууратын күнүн олохтуур туһунан этиини өйүүбүн. Регион норуоттар доҕордоһууларын, омук икки ардыгар эйэ уонна сөбүлэҥ баарын көрдөрөр холобур буолар», — диэн Айсен Николаев эттэ.

Ону тэҥэ кини омук эйэтин уонна сөбүлэҥин бөҕөргөтөргө кылааты киллэрбит дьоҥҥо өрөспүүбүлүкэ судаарыстыбаннай бириэмийэтин олохтуурга этии киллэрдэ.

Ил Дархан бэлиэтээбитинэн, өрөспүүбүлүкэҕэ Саха сирин төрүт дойду оҥостубут 135 араас омук бэрэстэбиитэлэ олорор. Бүтэһик үс сыл иһигэр регион нэһилиэнньэтэ оҕо төрөөһүнүнэн эрэ буолбакка, тас дойдуттан көһөн кэлэр дьон ахсааныттан эмиэ улаатар.

«Саха сирэ — Уһук Илиҥҥэ нэһилиэнньэ кэҥээһининэн үчүгэй көрдөрүүлээх соҕотох регион буолар, оттон оҕо төрөөһүнүнэн дойдуга сэттис миэстэҕэ сылдьар. Бу көрдөрүү сайдыы сөптөөх хайысханан баран иһэрин туоһулуур — экономика көрдөрүүтүн тупсуута дьон олоҕор дьайар — төрөөһүн улаатар, нэһилиэнньэ олоҕун уһуна улаатар», — диэн эттэ.