Саха сиригэр айыллыбыт искусственнай быары Юрий Трутневка көрдөрдүлэр

Саха сиригэр үрдүк технологиялар көмөлөрүнэн оҥоһуллубут ECLiS искусственнай быары Россия бэрэсидьиэнин Уһук Илиҥҥи Федеральнай Уокурукка боломуочуйалаах бэрэстэбиитэлэ Юрий Трутневка, Уһук Илини, Арктиканы сайыннырыыга миниистиригэр Алексей Чекуновка уонна Ил Дархан Айсен Николаевка көрдөрдүлэр.

«Билигин быары көһөрүү эпэрээссийэтин икки-үс сыл устата кэтэһиэххэ сөп. Хомойуох иһин, сорох дьон бэйэлэрин уочараттарыгар тиийбэккэ тыыннара быстар. Өскөтүн, биһиги учуонайдарбыт искусственнай быары оҥоруу бырайыагын олоххо киллэрдэхтэринэ, бу сытыы кыһалҕа быһаарыллыаҕа», — диэн Айсен Николаев бэлиэтээтэ.

Бырайыак көдьүүстээҕин көрдөрөн быйыл алтынньыга «Unicorn capital partners» инвестициялыыр ааҕыныстыба ыҥырыытын тутта.

Бу оҥоһуу гемодиализтан сүрүн уратыта — биотехнологияларга олоҕурар, ол эбэтэр быар килиэккэлэриттэн турар. Онон хааны ыраастыырын таһынан, быар үлэтин толорон белогунан хааччыйар.

Билиҥҥи туругунан, биотехнологическай лаборатория «Якутия» Технопарка «Биотехнология» эйгэтигэр бырайыактаах 15 резидент-хампаанньаларын базата буолар.

Инникитин былааҥҥа араас хайысхалаах лабораториялардаах биотехнологическай киин баар. Саха сиригэр маннык киин аһылыннаҕына чөлгө түһэрэр медицина уонна килиэккэ технологияларыгар, биоинформатика эйгэтигэр, тыа хаһаайыстыбатын биотехнологиятыгар, ону тэҥэ Национальнай технологическай көҕүлээһиннэргэ киирэр атын хайысхаларга чинчийиини ыытар уонна саҥа бородуукталары оҥорор кыахтаныаҕа.