Россия Арктическай регионнарын олохтоохторугар «Золотой ворон» норуоттар икки ардыларынааҕы киинэ бэстибээлин режиссердарын бастыҥ үлэлэрин көрдөрүөхтэрэ. Бу туһунан ТАСС иһитиннэрэр.
«Сыллата Чукоткаҕа ыытыллар «Золотой ворон» киинэ бэстибээлин бырагырааматыгар араас сылларга киирбит чаҕылхай киинэлэри Арктикаҕа киэҥ эйгэҕэ таһаарыахтара», — диэн иһитиннэриигэ этиллэр.
Киинэлэри Чукоткаҕа, Магаданскай уобаласка, Саха сиригэр, Красноярскай кыраайга, Мурманскай уонна Архангельскай уобаластарга, Ямало-Ненецкэй уонна Ханты-Мансийскай автономной уокуруктарга, Коми уонна Карелия өрөспүүбүлүкэлэригэр көрдөрүөхтэрэ.
Бэстибээл чэрчитинэн киинэни көрдөрүү босхо буолуоҕа. Киинэ тыйаатырдарыгар, библиотекаларга, киинэ кулууптарыгар, култуура уонна ыччат кииннэригэр, оскуолаларга уонна үнүбэрсиэттэргэ тэриллиэҕэ.
«Золотой ворон» норуоттар икки ардыларынааҕы Арктика киинэ бэстибээлэ Анадырьга ыытыллар.