Балаҕан ыйын 23-тэн 30 күнүгэр диэри өрөспүүбүлүкэ судаарыстыбаннаһын күнүнэн тэрээһиннэр ыытыллыахтара. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Ол курдук, Саха сирин үрдүнэн төрөөбүт дойдуга бэриниилээх буолуу уруоктара, анал тиэмэлээх уонна патриотическай киэһэлэр, куонкурустар, викториналар, быыстапкалар, флешмобтар тэриллиэхтэрэ.
Өрөспүүбүлүкэ түмэллэригэр Аһаҕас ааннар күннэрэ уонна экскурсиялар ааһыахтара. «Үргэл» арт-галерея «Биир хартыына туһунан» онлайн-рубриканы тэрийиэҕэ, онно өрөспүүбүлүкэ уһулуччулаах дьонун мэтириэттэрин көрдөрүөхтэрэ. Хотугу норуоттар култуураларын уонна историяларын түмэлэ Судаарыстыбаннас күнүгэр аналлаах виртуальнай быыстапканы ыытыаҕа.
Балаҕан ыйын 25-27 күннэригэр Нам Хатырыгын, Үөһээ Бүлүү Харбалааҕын уонна Таатта Чөркөөҕүн түмэллэригэр бэлиэ күҥҥэ аналлаах Аһаҕас аан күннэрэ тэриллиэхтэрэ. Хомус түмэлэ «Саха норуотун хомустарын» сүрэхтиэҕэ.
СӨ ыччат министиэристибэтэ бэйэтин Instagram-гар флешмоб оҥоруоҕа. Ону тэҥэ, муниципальнай тэриллиилэри уонна куорат уокуруктарын кытта өрөспүүбүлүкэ былааҕын тутан массыынан айан видеоролигын бэлэмин тэрийиэҕэ.
Балаҕан ыйын 27 күнүгэр СӨ бырабыыталыстыбата уонна салалтата кыттыылаах Платон Ойуунускай, Максим Аммосов,Исидор Барахов, Илья Винокуров, Алексей Кулаковскай,Василий Никифоров — Күлүмнүүр, Степан Васильев, Степан Аржаков, Владимир Ларионов пааматанньыктарыгар, Гаврил Чиряев, Юрий Прокопьев бюстарыгар, Степан Аржаков мемориальнай дуоскатыгар тыыннаах сибэккини ууруу сиэрэ-туома ыытыллыаҕа.
Маны таһынан, Дьокуускайга Семен уонна Софрон Даниловтарга пааматынньыгы сүрэхтиэхтэрэ. Мэҥэ Хаҥаласка И.М. Сосин аатынан кииннэммит библиотека тиһигин аһыллыыта былааннанар.
Бу күн өрөспүүбүлүкэ оскуолаларыгар төрөөбүт дойдуга бэриниилээх буолуу уруоктара буолуохтара. Ону тэҥэ, олохтоох бириэмэнэн 19:00 чааска, Саха сирин судаарыстыбаннаһын күнүгэр, «Россия – мин историям» түмэлгэ «Хотугу Форум» Хотугу регионнар норуоттар икки ардыларынааҕы тэрилтэлэрин 30 сылыгар аналлаах тэрээһин буолуоҕа.
III-с норуоттар икки ардыларынааҕы «Бигэ туруктаах сайдыыга хотугу форум» ыытыллар тиэмэтэ — «Климат уонна ирбэт тоҥ», балаҕан ыйын 27-30 күннэригэр Саха сирин уопсастыбаннай киинигэр буолуоҕа.