Саха сирин тыйаатырдара байыастарга көмөҕө 350 тыһ.солк.ыыппыттар — НВК Саха

СӨ тыйаатырдара кулун тутар 27 күнүгэр норуот икки ардыларынааҕы тыйаатыр күнүгэр кэнсиэр көрдөрбүттэр. Киирии билиэттэртэн киирбит үбү, уопсай сууманан 350 тыһ.солк. анал байыаннай дьайыы кыттыылаахтарыгар уонна кинилэр дьиэ кэргэттэригэр көмөҕө ыыппыттар.

Кэнсиэргэ өрөспүүбүлүкэ тыйаатырдара бары кэриҥэ кыттыбыттар, ону тэҥэ, култуура тэрилтэлэрин устудьуоннара кыттыспыттар.

«Мин ис сүрэхтэн хас биирдии тыйаатыр ситиһиитинэн уонна кыайыытынан киэн туттабын уонна үлэһиттэр бу бэлиэ күнү маннык форматтаах ыыппыттарыгар махталбын тиэрдэбин. Уопсайа 350 тыһ.солк.хомулунна, ону Донбаһы өйүүр уонна көмө оҥорор Хотугулуу-Илиҥҥи пуондаҕа тиксэриэхтэрэ», — диэн СӨ култуураҕа уонна духуобунай сайдыыга миниистирэ Юрий Куприянов эттэ.

Кэнсиэргэ А.С.Пушкин аатынан нуучча тыйаатырын, Былатыан Ойуунускай аатынан саха тыйаатырын артыыстара,«Талаан» тыйаатыр устуудьуйатын иитиллээччилэрэ, опура уонна балет тыйаатырын, аҕыйах ахсааннаах хотугу норуоттар тыйаатырын, үүнэр көлүөнэ тыйаатырын артыыстара уонна «Тускул» музыкальнай-театральнай оҕо устуудьуйата кыттыбыттар. Ону тэҥэ эстрада тыйаатырын, үҥкүү тыйаатырын артыыстара, А.Д.Макарова аатынан Дьокуускайдааҕы култуура уонна искусство колледжа, «Виртуозы Якутии» судаарыстыбаннай скрипачтар ансаамбыла, ГТОиБ балетын уонна хорун солистара, Нерюнгри куукула тыйаатыра, Арктическай судаарыстыбаннай култуура уонна искусство института уонна олоҥхо тыйаатыра кыттыбыттар.