Алтынньы 23-26 күннэригэр Сочи куоракка V төгүлүн ыытыллар «Sochi – New Star!» аан дойдутааҕы бэстэбээл-куонкуруска Чурапчы улууһун култуура үлэһиттэрэ ситиһиилэннилэр. Бу туһунан НКИХ «Саха» иһитиннэрэр.
Бэстибээл-куонкуруска оҕолортон саҕалаан улахан дьоҥҥо тиийэ уопсайа 400-чэ кыттаачы кыттыбыт.
Чурапчы дьоно саха норуота күн бүгүҥҥэ диэри илдьэ кэлбит ырыа-тойук, оһуохай, төрүт дьарыктары уо.д.а үгэстэрбитин сатабыллаахтык туһаннылар.
«Биһиги бу тэрээһиҥҥэ олус көхтөөхтүк кытынныбыт. Биһиги атыттартын уратыбыт диэн саха норуотун култууратын, ырыатын-тойугун, төрүт дьарыктарын илдьэ сылдьар буоламмыт дьон-сэргэ ортотугар тута улахан сэҥээриини ыллыбыт дии саныыбын», — диэтэ Чакырдааҕы фольклор дьиэтин дириэктэрэ Мария Матвеева.
«Эстрада ырыата» хайысхаҕа Хайахсытааҕы «Алаһа» Норуот айымньытын дьиэтин дириэктэрэ Владислав Поисеев, Чакырдааҕы Фольклор дьиэтин уус-уран салайааччыта Сардаана Макарова, «Фольклор» хайысхаҕа Чакырдааҕы фольклор дьиэтин «Дорҕоон номоҕо» этно-бөлөҕө уонна исписэлииһэ Александра Васильева I степеннээх лауреат буоллулар.
«Декоративнай-прикладной искусство» хайысхатыгар, Чакырдааҕы Фольклор дьиэтин дириэктэрэ Мария Матвеева уонна Сылаҥнааҕы сынньалаҥ киин «Күндүл» этно-бөлөҕө Гран-при аатын ыллылар.
Бэстибээл-куонкуруска кыайбыттар Москваҕа улахан күрэххэ кыттар чиэскэ тиксибиттэр. Бу ситиһиилэр Чурапчы улууһун култуура үлэһиттэригэр сайдыыга улахан хардыы буолар. Салгыы араас таһымнаах күрэхтэһиилэргэ көхтөөхтүк кыттарга сыал-сорук туруоруммуттар.
«Маннык үрдүк таһымнаах куонкурустарга кыттар олус наадалаах. Биһиги бэйэбит норуоппут туһунан киэҥ эйгэҕэ таһаарарбыт иннибит диэки эрэллээхтик барарбытыгар туһалаах буолар. Элбэх суолу арыйар эбит», — диэн Мария Матвеева эттэ.