Кулун тутар 25 күнүгэр Muus uSTAR бэстибээл чэрчитинэн, режиссер, сценарист, «Адмиралъ», «Викинг» уонна «Союз спасения» киинэлэр ааптардара Андрей Кравчук Саха сирин киинэ устааччыларыгар анаан маастар-кылаас ыытыаҕа. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
«Маастар-кылаас кыттааччылара киинэ хайдах айыллан тахсарын билиэхтэрэ. Историческай драма маастар буоларын быһыытынан Андрей Кравчук кистэлэҥинэн уонна уустук киинэни устуу уратытын бэйэтин киинэлэрин холобуругар кэпсиэ», — диэн иһитиннэриигэ этиллэр.
«Кинематограф и искусство» трек кыайыылаахтара биллиилээх режиссерга бэйэлэрин сценарийдарын көрдөрүөхтэрэ.
Маны таһынан, маастар-кылаас чэрчитинэн 2010-с сыллардааҕы Сирияҕа буолбут түбэлтэҕэ аналлаах «Однажды в пустыне» Андрей Кравчук саҥа киинэтэ көрөөччү дьүүлүгэр тахсыа.
Көрсүһүү кулун тутар 25 күнүгэр Cinema Center киинэ тыйаатырыгар буолуо. Маастар-кылааска кыттарга сайаапканы respublika.kino@yandex.ru почтаҕа ааты-суолу, араспаанньаны уонна кыттааччы төлөпүөнүн нүөмэрин ыйан ыытара наада.