Бүгүн, олунньу 13 күнүгэр, Семен Андреевич Новгородов төрөөбүтэ 130 сылынан пааматынньыгар сибэкки дьөрбөтө, төрөөбүт алааһыгар алгыстаах алаадьы уурдулар. Бу туһунан Чурапчы улууһун дьаһалтатын пресс-сулууспата иһитиннэрэр.
«Чурапчыттан төрүттээх сахалартан бастакы тыл үөрэхтээҕэ, сахалыы маассабай суругу-бичиги төрүттээччи, лингвист учуонай Семен Андреевич Новгородов бүгүн, олунньу 13 күнүгэр, төрөөбүтэ 130 сылынан, Чурапчы улууһун, Болтоҥо нэһилиэгин дьаьалталара, уопсастыбаннас, ыччаттар Семен Андреевич Новгородов төрөөбүт-үөскээбит алааһыгар Чуораайыттаҕа тахсан пааматынньыгар сибэкки дьөрбөтө, төрөөбүт алааһыгар алгыстаах алаадьы уурдулар», — диэн иһитиннэриигэ этиллэр.
Ыччаттар «Төрөөбүт соругум», ону тэҥэ биир дойдулаахтара Борис Горохов «Бээдьэ уола Сэмэн Ноҕуруодапка» диэн хоһооннорун аахтылар.
Саха норуотугар сүҥкэн кылаатын киллэрбит, бэйэтин суолун-ииһин хаалларбыт сүдү киһибит аатын үйэтитэр сыалтан Чурапчы улууһугар олунньу ый 7-17 күннэригэр араас хабааннаах тэрээһиннэр буолуохтара.