1937 с. Саха АССР Олох-дьаһах коммунальнай хаһаайыстыбатын бастакы наркомунан ананан хорутуулаахтык үлэлээбит Ананий Кононович Андреев туһунан кинигэ сүрэхтэниитэ буолла.
Тэрээһиҥҥэ Ил Түмэн судаарыстыбаннай мунньах бэрэссэдээтэлэ Алексей Еремеев кытынна.
Кинигэҕэ Ананий Кононович олоҕун, үлэтин туһунан архыып докумуоннара киирдилэр. Кинигэ ааҕымтыа, өйдөнөр тылынан сурулунна. Улахан көмөнү национальнай архыып үлэһиттэрэ оҥорбуттар. ГУП ОДьКХ үбүлээһининэн 300 ахсаанынан бэчээттэнэн таҕыста.Кинигэ ааптара Галина Арылахова буолар.
Ананий Кононович 1929-31 сылларга Киин ситэриилээх кэмитиэт уонна норуодунай хамыһаардар кэмитиэттэрин бэрэссэдээтэллэринэн талыллан үлэлээбит. Сахалартан бастакы инженер -теплоэнергетик үөрэхтээх киһи быһыытынан Дьокуускайга уот станциятын үлэлэппитэ, итиэннэ куорат генбылаанын оҥорууга сүҥкэн үтүөлээх.
Хомойуох иһин, Ананий Андреев сымыйа балыырга түбэһэн, 1938 сыллаахха хаайыллар, 1943 с. хомолтолоохтук олохтон туоруур. 1956 с. аата толору ырааһырар.